VOV4.Xơ Đăng - Klêi kơ’nâi Khu kơtú ƀalong U23 Việt Nam châ  kâ 1 – 0 Khu kơtú ƀalong U23 kong têa Siam, châ kâ ối má môi môn kơtú ƀalong khu kơnốu a Hneăng tơ’noăng ivá Đông Nam Á (SEA Games 31), pôa Nguyễn Xuân Phúc, Kăn xiâm hnê ngăn tơnêi têa; pôa Phạm Minh Chính, Ngế pro xiâm hnê ngăn tơnêi têa; pôa Vương Đình Huệ, Kăn xiâm hnê ngăn Kuô̆k hô̆i ƀă pôa Võ Văn Thưởng, Kăn cheăng tung Khu xiâm kal kí, Kăn pơkuâ hnê ngăn cheăng Đảng hiăng chu a plông kơtú ƀalong rơkâu ƀă diâp Huy chương ‘na kơtú ƀalong kơnốu diâp ăm mâu ngế tung Khu hnê kơtú ƀalong ƀă mâu ngế kơtú ƀalong U23 Indonesia; diâp Huy chương hâu diâp ăm mâu Khu hnê kơtú ƀalong ƀă mâu ngế kơtú ƀalong U23 kong têa Siam; ƀă diâp Huy chương Mêa diâp ăm pôa Park Hang-seo, Kăn hnê kơtú ƀalong, mâu ngế hnê kơtú ƀalong ƀă mâu ‘’ngế kơtú ƀalong hơlŏng trĭng’’, mâu ngế hiăng tơ’noăng tâi ivá tơná vâ châ kâ ăm Tơnêi têa ƀă tơdroăng phiu ro kân ăm mơngế hâk vâ ngăn ƀalong lâp tơnêi têa.

Kăn xiâm hnê ngăn tơnêi têa ƀă Ngế pro xiâm hnê ngăn Chin phuh rơkâu Khu hnê kơtú ƀalong ƀă Khu kơtú ƀalong kơnốu U23 tơnêi têa Việt Nam

Teăng mâ khu râ kăn pơkuâ Đảng, Tơnêi têa ƀă mơngế hâk vâ ngăn kơtú ƀalong lâp tơnêi têa, pôa Nguyễn Xuân Phúc hiăng kheăn kơdeăn ƀă mơnê pôa Park Hang-seo ƀă mâu ngế kơtú ƀalong U23 Việt Nam hiăng châ kâ pri, ƀlêi trâng a SEA Games 31. Pôa Phạm Minh Chính hiăng ai kơthô rơkâu Khu hnê kơtú ƀalong ƀă mâu ngế kơtú ƀalong U23 tơnêi têa Việt Nam klêi kơ’nâi mâu ngế kơtú ƀalong châ kâ Huy chương Mêa a SEA Games 31.

Châ kâ pri tiah hâi kố, rơtế Huy chương Mêa dêi mâu ngế kơtú ƀalong mơngế kơdrâi ƀă mâu môn tơ’noăng a SEA Games 31 châ kâ hiăng mơhnên ki rơkê kơtú ƀalong Việt Nam tối krê, tơ’noăng ivá Việt Nam tối tơdjuôm a kơpong ƀă chôa ‘lâng ƀă râ lâp plâi tơnêi.