VOV4.Xơ Đăng - Kơxo lơ 9/6, Ƀinh đoân 11, ối tung Khu xiâm pơkuâ lêng tơkŭm po Leh tơbâ 40 hơnăm Hâi mơjiâng Ƀinh đoân (11/6/1982 – 11/6/2022 ƀă tơdáh Mê dái gâk kring Tơnêi têa ối má pái. A roh leh, teăng mâ khu râ kăn pơkuâ Đảng ƀă Tơnêi têa, Kăn xiâm hnê ngăn tơnêi têa diâp Mê dái Gâk kring Tơnêi têa ối má Pái diâp ăm Ƀinh đoân 11.

Kăn xiâm hnê ngăn tơnêi têa diâp Mê dái Gâk kring Tơnêi têa ối má pái ăm Ƀinh đoân 11

Xông tơpui hnê mơhno a roh leh, Kăn xiâm hnê ngăn tơnêi têa mơnhên Ƀinh đoân 11 mơhno ivá tâi tâng tung kơchuâ pro, mơjiâng pro mâu kế tơmeăm ki xiâm dêi Khu xiâm pơkuâ lêng; pro xiâm kối tung kơvâ mơjiâng dêi Khu lêng, tung mê, má môi cho tơmeăm Hngêi Kuô̆k hô̆i Lếo châ kong têa Lếo kheăn kơdeăn hôm, kum mơdêk tơdroăng ki loi tơngah, tíu cheăng dêi tơnêi têa, Khu lêng pin ƀă pro thăm rŭm môi tuăn pơla Việt Nam – Lếo.

Pêi pro hnoăng cheăng la ngiâ, Kăn xiâm hnê ngăn tơnêi têa pơkâ thế Ƀinh đoân 11, ối tung Khu xiâm pơkuâ lêng pơtối pêi pro tơtro tâ nếo tơdroăng cheăng, hnoăng cheăng dêi Khu lêng, mơnhông mơdêk ivá ó rơdêi dêi khu tê mơdró kơvâ cheăng lêng tung pêi pro tơrŭm mơnhông mơdêk cheăng kâ ƀă thăm rak krá tơniăn cheăng lêng, gâk kring.

A Sa Ly tơplôu ƀă tơbleăng