VOV4.Xơ Đăng - Kơxo lơ 10/6, a kong pơlê Quảng Nam, pôa Nguyễn Xuân Phúc, Kăn xiâm hnê ngăn tơnêi têa pơkuâ Hneăng hôp veăng tơpui tối ƀă tơdroăng tơkêa bro ‘’Troăng pêi ton xŏn mơjiâng ƀă pêi kêi đeăng tơnêi têa tiô luât xah hô̆i chuh ngiah Việt Nam troh hơnăm 2030, mơnhên troăng prôk troh hơnăm 2045’’ xo rơkong tơpui tối dêi mâu khu râ kăn pơkuâ cheăng Đảng kong pơlê, pơlê kong kơdrâm kơpong peăng tơdế tơnêi têa – Tây Nguyên. Kố cho hneăng hôp má péa klêi kơ’nâi hneăng hôp roh má môi a kong pơlê Quảng Ninh kơtăn kố iâ hâi.

Xông tơpui a hneăng hôp, pôa Nguyễn Xuân Phúc kheăn kơdeăn, mâu khu râ kăn pơkuâ hnê ngăn cheăng Đảng pơlê kong kơdrâm, kong pơlê hiăng tối hên rơkong tá hiâm mơno, pôu râng hnoăng cheăng, tơdrăng, kuăn pơlê pơkuâ dêi hnoăng cheăng tung hên tơdroăng xiâm dêi tơdroăng tơkêa bro. Tơdroăng xiâm hiăng tối tŭm tâi tâng mâu tơdroăng kal xiâm tung mơjiâng ƀă pêi kêi đeăng Tơnêi têa tiô luât xah hô̆i chuh ngiah Việt Nam.

Mâu tơdroăng mơnhông ton xŏn tung tơkêa bro hiăng mơnhên tro tơdroăng xiâm; mâu hnoăng cheăng, troăng pêi ki nhên, tơtro ƀă tơdroăng kal dế nôkố. Kăn xiâm hnê ngăn tơnêi têa tối, mâu rơkong tơpui tối mơhno hiâm mơno pơ’lêh, pói vâ păng ‘nâng châ veăng kum tung tơdroăng pơ’lêh nếo ƀă mơnhông mơdêk tơnêi têa. Kố xuân cho xiâm kối vâ khu râ kăn pơkuâ Đảng, Tơnêi têa pơkuâ, hnê mơhno pêi pro ƀlêi trâng hnoăng cheăng mơjiâng ƀă pêi kêi đeăng Tơnêi têa tiô luât xah hô̆i chuh ngiah dêi kuăn pơlê, xua kuăn pơlê,  pêi ăm kuăn pơlê, xua Đảng pơkuâ.

A Sa Ly tơplôu ƀă tơbleăng