VOV4.Xơ Đăng - Kơmăng lơ 28/4, a kong pơlê Thừa Thiên Huế, Tíu xiâm ngăn khu lo tŏng veăng Việt Nam tơrŭm ƀă Vi ƀan hnê ngăn kong pơlê tơkŭm po leh tơbleăng Khế tŏng kum hơnăm 2022 pơxá “Tơrŭm pơlê pơla – Tơdjâk tơdroăng pêi pro lĕm” ƀă tơbâ Hâi Khu lo tŏng veăng ƀă Trăng lưỡi liềm đỏ kong têa ê (8/5). Pôa Nguyễn Xuân Phúc, Kăn xiâm hnê ngăn tơnêi têa veăng hôp ƀă tơpui a rôh leh.

Khế tŏng kum hơnăm 2022 pơxiâm sap ing hâi lơ 1/5 troh hâi lơ 31/5, tâi tâng Hô̆i mơ-eăm mơhnhôk tơlo châ 400 rơtal liăn vâ kum 1 rơtuh ngế ki ai tơdroăng rêh ối xơpá, tung mê ai 100 rơpâu tíu ki tŏng kum. Malối, a Leh tơbleăng Khế Tŏng kum hơnăm 2022, Khu lo tŏng veăng Việt Nam pơxiâm po 2 tơdroăng ki kal tơbleăng tung 5 hơnăm la ngiâ, mê cho tơdroăng: “Tơniăn ăm kuăn pơlê ki tơnăng ká xi xŏng kơtiê, xơpá” ƀă “Trếo kơhiâm ăm vâi hdrêng kơtiê, chó chêng tơvê kŏng”.

Tơpui a rôh leh, pôa Nguyễn Xuân Phúc krếo thế mâu kơ koan, khu tơrŭm, khu mơdró kâ, mâu khu ki ai hiâm mơno hơ-ui ƀă mâu kuăn pơlê pơtối tŏng kum, rơtế ƀă Khu lo tŏng veăng Việt Nam, mơjiâng pơlê pơla tơrŭm, kro mơdrŏng hiâm mơno lĕm, xua pơlê pơla tơdjâk tơdroăng ki pâ nhuô̆m.

Katarina Nga tơplôu ƀă tơbleăng