VOV4.Xơ Đăng - Drêng koh tơbâ 97 hơnăm Hâi Hlá tơbeăng Kăch măng Việt Nam, kong măng lơ 20/6, a Pơlê kong kân Hồ Chí Minh, kăn pơkuâ Pơlê kong kân trâm mâ mâu kơ koan chêh hlá tơbeăng. Veăng ƀă tơpui a rôh trâm mâ, pôa Nguyễn Xuân Phúc, kăn xiâm hnê ngăn tơnêi têa pơtroh rơkong troh tâi tâng kăn ƀô̆, ngế chêh hlá tơbeăng, ngế ki rah chêh, mâu ngế ki quay phim mâu kơ koan chêh hlá tơbeăng a Pơlê kong kân Hồ Chí Minh ƀă tâi tâng mâu ngế ki cheăng ‘na hlá tơbeăng tung lâp tơnêi têa hiâm mơno achê ƀă rơkong rơkâu tơniăn lĕm má môi.

Pôa Nguyễn Xuân Phúc, kăn xiâm hnê ngăn tơnêi têa tối nhên, ing mâu ƀai chêh dêi tơná, hlá tơbeăng mơni “tối tơbleăng hdrối” vâ mâu khu tơrŭm, mâu ngế krê ôh tá chiâng ƀă ôh tá khên pro xôi, ôh tá khên kâ kơluâ. Malối ƀă hnoăng cheăng séa ngăn, tơbleăng tung pơlê pơla, hlá tơbeăng mơni kô veăng kum mơjiâng “Tơnêi têa dêi kuăn pơlê, xua kuăn pơlê ƀă dêi kuăn pơlê”. Vêh tối hneăng hơnăm Pơlê kong kân Hồ Chí Minh ƀă mâu kong pơlê peăng Hdroh trâm hên ki tro lŭp xua pơreăng COVID-19.

Pôa Nguyễn Xuân Phúc, kăn xiâm hnê ngăn tơnêi têa khĕn kơdeăn mâu khu chêh hlá tơbeăng hiăng ôh tá xâu tơdroăng xơpá, hâi măng pêi cheăng a tíu ki hbrâ mơdât pơreăng, ing mê, kum kuăn pơlê tung lâp tơnêi têa hlê plĕng ki xơpá, hlo nhên ivá rơdêi, tơdroăng khên tơnôu dêi Đảng, ƀô̆, khu kăn pơkuâ mâu kong pơlê tơkâ luâ pơreăng kân, rế hía rế ‘mâi mơnhông mâu tơdroăng cheăng kâ rêh ối pơlê pơla.

Katarina Nga tơplôu ƀă tơbleăng