A hneăng hôp, Hô̆i đong hiăng tơpui tơno ƀă veăng tối mâu tơdroăng hiăng châ pêi pro tung mâu tơdroăng cheăng, malối cho tơdroăng cheăng lêng, kring tơniăn, tơpui kâ tung pơla hdrối kố nah; tối nhên tơdroăng tung lâp plâi tơnêi, tung kơpong ƀă mâu tơdroăng tơdjâk ƀă Việt Nam; tối tơdroăng cheăng pêi tung hơnăm 2024.

‘Na tơdroăng kal tơpui a hneăng hôp Hô̆i đong hơnăm 2024, Hô̆i đong vâ môi tuăn tơpui tơno, ăm veăng hnê tối mâu tơdroăng ki kal, tơdroăng tơdjâk troh ‘na lêng, kring tơniăn, tơpui kâ, ing mê tí tăng ‘nâi plĕng, veăng hnê tối ƀă Khu xiâm kal kí, Kuô̆k hô̆i, Chin phuh.

Teăng mâ Hô̆i đong, Kăn xiâm hnê ngăn tơnêi têa Võ Văn Thưởng pơkâ thế, tung la ngiâ, mâu lêng, kơ koan pơkuâ cheăng tơdjâk troh pơtối séa ngăn, tí tăng ngăn, hbrâ vâ ‘nâi nhên tŭm tơdroăng, tăng ‘nâi plĕng, tối nhên, tối hdrối tơdroăng tung lâp plâi tơnêi, tung kơpong, tung tơnêi têa, ing mê, teăm tối ăm Đảng, Tơnêi têa mâu tơdroăng vâ pêi, tơmâng kring vế xiâm tuăn mơno dêi Đảng tơplâ ƀă khu kơneăm; pơtối rak vế pêi pro tơdroăng tơrŭm, ki rơdêi môi tuăn dêi rơpó tâi tâng kuăn pơlê tung tơdroăng mơjiâng ƀă kring vế Tơnêi têa.