VOV4.Xơ Đăng - Kơxê lơ 25/4, pôa Nguyễn Xuân Phúc, kăn xiâm hnê ngăn tơnêi têa, kăn hnê ngăn Hô̆i đong khu xiâm lêng troh pôu, pêi cheăng, séa ngăn tơdroăng pêi pro hnoăng cheăng lêng a Kuân khu 1. Tơpui a rôh pêi cheăng, pôa Nguyễn Xuân Phúc, Kăn xiâm hnê ngăn tơnêi têa tối nhên, tung pơla hdrối nah, Khu pơkuâ ngăn lêng Kuân khu 1 hiăng đi đo pêi pro tro hnoăng cheăng lêng ƀă tơdroăng gak kring tung tơnêi têa.

Pôa Nguyễn Xuân Phúc, Kăn xiâm hnê ngăn tơnêi têa pơkâ Đô̆i ki rơkê khât Kuân khu 1

Malối, Khu lêng kring vế tơniăn Kuân khu hiăng rơtế ƀă khu râ Đảng, khu kăn pơkuâ kong pơlê veăng pêi pro châ tơƀrê hnoăng cheăng hbrâ mơdât, ‘mâi mơnhông tơdroăng mơdât xía vâ kong mêi khía mơhot, têa kân lân lu, tŏng xo mâu ngế hliăng tiâ ƀă hên tơdroăng ki ê, tơdroăng pâ mơnê mâu ngế ai hnoăng, xut tah hrâ mơnguâ kơtiê, mâu tơdroăng cheăng tŏng kum, pleăng hnoăng cheăng, hbrâ mơdât pơreăng kân COVID-19, veăng kum pro lĕm tơ’nôm um méa ‘’Mố đô̆i Pôa Hồ’’ tung hiâm mơno kuăn pơlê.

Kăn xiâm hnê ngăn tơnêi têa pơchân, Khu lêng kring vế tơniăn Kuân khu 1 athế đi đo khŏm mơ-eăm pêi klêi tro má môi mâu tơdroăng cheăng lêng, gak kring, hbrâ rơnáu tơplâ ƀă tơplâ rak vế Tơnêi têa tung tơdroăng nếo, pơtối pêi pro mâu tơdroăng ki kơnía dêi Chiến khu 1, Liên khu 1, Liên khu Việt Bắc, Kuân khu Việt Bắc ton nah ƀă Kuân khu 1 hâi kố.

Katarina Nga tơplôu ƀă tơbleăng