VOV4.Xơ Đăng - Tung roh pêi cheăng a mâu kong pơlê peăng mâ hâi lo pá hdroh tơnêi têa, kơxo lơ 7/4, pôa Nguyễn Xuân Phúc, Kăn xiâm hnê ngăn tơnêi têa hiăng troh lăm pôu, rơkâu Têt tiô khôi hmâ vâi krâ nah Chôl Chnăm Thmây a Hngêi trung hnê tơdroăng khôp Phop Nam tông Khmer, po a pơlê kân Ô Môn, pơlê kong kân Cần Thơ. Hngêi trung hnê khôp Phop Nam tông Khmer a pơlê kong kân Cần Thơ châ mơjiâng hơnăm 2006 vâ hnê mơjiâng mâu ngế hriâm mơngế Khmer a râ hriâm cử nhân.

Sap ing mơjiâng troh nôkố, Hngêi trung hiăng mơjiâng châ 5 khoă ƀă lối 200 ngế hriâm mơgêi hriâm cưr nhân Phop hok, kum mơdêk tơdroăng rơkê plĕng dêi mơngế hriâm, mâu ƀok phop a mâu hngêi chuô Khmer kơpong peăng mâ hâi luô pá hdroh tơnêi têa. Tung tơdroăng hbrâ tơdah Têt tiô khôi vâi krâ nah Chôl Chnăm Thmây, xông tơpui a Hngêi trung, pôa Nguyễn Xuân Phúc rơkâu mâu Ƀok Phop, jâ Phop, kuăn khôp Phop Nam tông Khmer; tơdrêng amê pơtroh rơkong kơ-êng, rơkâu Têt troh tâi tâng kuăn khôp Phop Khmer tơdah Têt tiô khôi hmâ vâi krâ nah Chôl Chnăm Thmây hơnăm 2022 pêng păm ivá, tơniăn, phiu ro, hơniâp lĕm.

A Sa Ly tơplôu ƀă tơbleăng