Tơdroăng tơkŭm po châ mơ’no tơdrêng tung troăng hyôh măng tung mâu trang pơlê pơla dêi Khu xiâm pơkuâ Đoân, Hô̆i đong Đô̆i tơnêi têa, phân mêm ‘’Droh rơtăm Việt Nam’’ châ tơdjêp mơ’no tơdrêng tung um ƀă 14 tíu hrik hyôh a mâu kong pơlê, pơlê kong kơdrâm cho Hà Giang, pơlê kong kân Hà Nội, kong pơlê Lào Cai, Ninh Bình, Hải Phòng, Quảng Ninh, Hà Tĩnh, Dak Lak, Lâm Đồng, Đồng Nai, Bình Dương, pơlê kong kân Hồ Chí Minh, kong pơlê Bến Tre, Kiên Giang.

Krê a tíu mơ’no hyôh xiâm Bình Phước ai 1.000 ngế vâi hdrêng veăng Kơmăng xah hêi ro. Châ tơkŭm po sap ing hâi lơ 19/9 troh hâi lơ 29/9 hơnăm kố, Tơdroăng Trung thu ăm o ‘’On tơdrong bâ eăng tơdroăng pói vâ’’ hiăng ƀă dế châ Đoân droh rơtăm, Hô̆i đong đô̆i mâu râ, mâu khu tơkŭm po ƀă hên tơdroăng ƀă lối 5 rơtuh to on tơdrong ƀă kơxuô tơmeăm trung thu diâp ăm mâu vâi o vâi hdrêng lâp tơnêi têa.

Kố cho kơxuô tơmeăm kơmăng Trung thu ăm mâu vâi muăn vâi hdrêng ai tơdroăng rêh ối pá puât. Xông tơpui a kơmăng xah hêi phiu ro, pôa Võ Văn Thưởng pơtroh mâu vâi hdrêng phô̆m xông kân, vâi hdrêng lâp tơnêi rơkong kơ-êng kơ-êng tuăn pâ ƀă pói vâ Khu xiâm pơkuâ Đoân Droh rơtăm Kŏng san Hồ Chí Minh ƀă mâu kơ koan, khu tơrŭm cheăng ƀă lâp pơlê pơla rơtế pơtối tơdjuôm ivá vâ ‘’hơnăm ki lâi mâu muăn vâi hdrêng phô̆m xông kân, vâi hdrêng xuân châ xah phiu ro, tơmiât pêi rơkê, tối ăm dêi pó tơdroăng phiu ro’’.