Tung rôh lăm pôu kong têa Nhuk, Kăn xiâm hnê ngăn tơnêi têa Võ Văn Thưởng hiăng tơdah Ngế pro xiâm hnê ngăn hneăng hdrối, Kăn phŏ hnê ngăn Đảng Dân chuh tự do (LDP) Aso Taro, Kăn hnê ngăn Đảng công Minh YamaguchiNatsuo, Kăn hnê ngăn Đảng kŏng san Nhuk Shii ƀă khu mâu kăn kuô̆k hô̆i, mơngế pú dêi Nhuk ki hmâ ƀă Việt Nam. A mâu rôh trâm mâ tơpui tơno, Kăn xiâm hnê ngăn tơnêi têa Võ Văn Thưởng  tối nhên, tơrŭm cheăng pơla Việt Nam- Nhuk hiăng chôa mơnhông tâk Tơrŭm cheăng tung tŭm tơdroăng xua pro hơniâp lĕm ƀă kro mơdrŏng a châu Á ƀă tung lâp plâi tơnêi ƀă dế vâ mơnhông tâ nếo tung tŭm tơdroăng, malối cho mâu kơvâ cheăng ki nếo mâ ngăn a tơdroăng tơrŭm cheăng ki nếo tung 50 hơnăm pơtối.

Kăn xiâm hnê ngăn tơnêi têa pơkâ thế mâu kăn cheăng kal kí Nhuk  tơmâng khât, mơdêk tơrŭm pêi mâu tơdroăng cheăng ki kal tung tơdroăng  tơrŭm cheăng ki nếo pơla péa tơnêi têa. Mâu kăn xiâm, mâu kăn kuô̆k hô̆i tối kô mơ-eăm tâi ivá tơná vâ veăng ‘no hnoăng a mơnhông tơrŭm cheăng pơla Việt Nam- Nhuk, tung mê, ai tá mơdêk trâm tơpui tơno ƀă mâu kăn hơnăm ối nếo, Kăn kuô̆k hô̆i péa tơnêi têa.