A rôh tơdah, Kăn xiâm hnê ngăn tơnêi têa Võ Văn Thưởng khê̆n kơdeăn tơrŭm cheăng kâ pơla Việt Nam - Nhuk mơnhông rơdêi, trâu rơdâ ƀă krá khât  tung tâi tâng mâu kơvâ cheăng, tung tơrŭm mơnhông mơdêk hên râ ƀă 100 khu tơrŭm cheăng kong pơlê hiăng châ mơjiâng. Kăn xiâm hnê ngăn tơnêi têa Võ Văn Thưởng  khê̆n kơdeăn tơdroăng mơ-eăm  dei Kăn pơkuâ kong pơlê Fukuoka ƀă mâu kăn kong pơlê tơring tung kơpong Kyushu tung tơdroăng mơdêk tơrŭm hên kơvâ cheăng ƀă Việt Nam.

Kăn xiâm hnê ngăn tơnêi pơkâ thế Kăn pơkuâ kong pơlê Fukuoka ƀă Kăn hnê ngăn mâu kong pơlê tung kơpong Kyushu mơ-eăm pêi mâu tơdroăng tơrŭm po mơdâ mơnhông tơdroăng tơrŭm cheăng  pơla mâu kong pơlê tung kơpong Kyushu khŏm mơnhông tơrŭm cheăng nếo mơdêk mâu khu tơrŭm cheăng pơla mâu kong pơlê Kyushu ƀă mâu kong pơlê dêi Việt Nam, malối tung kơvâ cheăng ki kong pơlê pêi rơdêi ai hlâu tơmeăm khoăng mê cho muâ pơliê pro tơmeăm, hriĕn pro mâu tơmeăm, xúa pêi chiâk deăng thôn pơlê rơkê plĕng, mơ’no tah têa ‘mêi.