Pôa Võ Văn Thưởng, Kăn xiâm hnê ngăn tơnêi têa  tối nhên, péa tơnêi têa Việt Nam - Cuba đi đo tơrŭm môi tuăn, tối ăm dêi rơpó ‘nâi mâu tơdroăng ki xơpá tung mâu rôh dêi kăch măng; tơmâng, hnê mơhnhôk dêi rơpó tơkâ luâ tơdroăng pá pơloăng mơnúa.

Kăn xiâm hnê ngăn tơnêi têa tối: Đảng, Tơnêi têa, kuăn pơlê Việt Nam phiu ro xua tơdroăng tơrŭm môi tuăn ƀă tơrŭm cheăng pơla Việt Nam - Cuba mơnhông krá tơniăn tung mâu kơvâ cheăng. Pôa Võ Văn Thưởng pơkâ thế, tơdrêng ƀă tơdroăng mơnhông mơdêk tâ nếo mâu rôh hôp tơrá mâu kăn xiâm, péa pâ mơdêk pêi mâu tơdroăng râm mâ tơpui tơno, tơrŭm cheăng pơla Khu xiâm pơkuâ ngăn lêng Việt Nam ƀă mâu lêng tơplâ kăch măng Cuba.

Tung pơla lâp plâi tơnêi ối hên tơdroăng xơpá tơvâ tơvân, tơrŭm cheăng lêng péa tơnêi têa ai pơxúa kân. Đảng, Tơnêi têa Việt Nam đi đo pro tơ’lêi hlâu vâ Khu xiâm pơkuâ ngăn lêng tơrŭm ƀă, hnê ăm dêi rơpó mâu tơdroăng cheăng, tơrŭm ƀă mâu khu xiâm mâu lêng tơplâ dêi kăch măng Cuba tung kơvâ cheăng ki péa pâ hiăng ai hlâu ƀă kal vâ tơrŭm cheăng ƀă dêi rơpó.