Pôa Võ Văn Thưởng, Kăn xiâm hnê ngăn tơnêi têa tối nhên xiâm dêi rôh lăm pôu pêi cheăng rơtế ƀă veăng Hôp mâu râ kăn tơrŭm cheăng lâp plâi tơnêi “Troăng ví ƀă Troăng prôk” rôh má 3,  vâ veăng ‘no hnoăng pơtối mơnhông mơdêk tơrŭm cheăng pơla péa tơnêi têa.

A ôh trâm mâ, péa ngế Kăn xiâm tối nhên pơtối po rơda a rôh trâm mâ mâu kăn ƀă rêm râ, mơdêk tơƀrê, pơxúa tung tơrŭm  mâu kơvâ cheăng, ki xiâm cho mơdêk tê mơdró tơdâng tơ’mô, krá tơniăn. Kăn xiâm hnê ngăn tơnêi têa pâ thế Sinuâ mơdêk rôe tơmeăm, malối tơmeăm pê lo ing chiâk deăng Việt Nam; mơdêk tơrŭm ‘no liăn cheăng, tơdjêp pro troăng prôk ƀă hên tơdroăng cheăng ki.

Pôa Võ Văn Thưởng xuân pơkâ thế péa pâ mơdêk trâm mâ kuăn pơlê ki xiâm cho  tơrŭm mơđah tơbleăng túa lĕm tro; ôm hyô, ai tiô púi vâ trâm tơpui tơno, mơnhông tơdroăng rêh ối tơniăn dêi kuăn pơlê.