Mâu kăn teăng mâ teăng mâ ăm vâ chê 500 ngế kuăn pơlê loi tơngah châ rah xo ing lâp mâu kong pơlê, pơlê kong kơdrâm lâp tơnêi têa troh veăng Tơdroăng kheăn kơdeăn, pơ-ô pơ-eăng mâu ngế ki kơhnâ rơkê cho ngế ki kuăn pơlê loi tơngah tung kuăn pơlê hdroâng kuăn ngo lâp tơnêi têa hơnăm 2023.

A roh trâm mâ, hên kăn teăng mâ mơngế ki kuăn pơlê loi tơngah tối tơbleăng Kăn xiâm hnê ngăn tơnêi têa ƀă tối ƀă mâu kăn teăng mâ ‘na mâu tơdroăng pêi ki pơxúa dêi tơná a pơlê pơla, môi tiah: hriâm tâp mâu troăng mơnhông cheăng kâ ƀă kơ’nâi mê pơtâng tối, tŏng kum, hnê mơhno kuăn pơlê a kong pơlê, mơhnhôk kuăn pơlê thăm veăng mơ-eăm xăm kơklêa kơdroh kơtiê, xut tah lôi khôi túa ki ôh tá lĕm tro, mơhnhôk kuăn pơlê mơjiâng pơlê pơla rŭm môi tuăn, mơjiâng khu rŭm môi tuăn tâi tâng hdroâng kuăn ngo ƀă hía hé.

Phiu ro trâm mâ mâu kăn teăng mâ ki kơhnâ rơkê, Kăn xiâm hnê ngăn tơnêi têa Võ Văn Thưởng tối rơdêi, Đảng, Tơnêi têa đi đo tơmâng, tơbleăng hên troăng hơlâ rak ngăn kuăn pơlê hdroâng kuăn ngo, tung mê, ai mâu tơdroăng pơkâ xiâm tơnêi têa vâ mơdêk tơdroăng rêh ối dêi kuăn pơlê hdroâng kuăn ngo.

Kăn xiâm hnê ngăn tơnêi têa pói vâ mâu krâ pơlê, kăn pơkuâ pơlê pơtối pơtâng tối, mơhnhôk kuăn pơlê hdroâng kuăn ngo rak vế, rak ‘măn, rak pơtâng, mơnhông ki kơnâ khôi túa lĕm ki má môi, veăng kum mơjiâng tơdroăng ki hâk vâ tơdjuôm dêi tơdroăng ki ai hên dêi khôi túa lĕm tro Việt Nam.