Kơxê lơ 6/1, a tíu pêi cheăng dêi Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa trâm mâ 50 ngế kăn teăng mâ vâ chê 2.000 ngế tung tơdroăng “Cheăng pêi tơdrăng lĕm” dêi Rơ’jíu um tơvi Việt Nam tung 8 hơnăm hdrối.  

Tối tơbleăng a rôh trâm mâ, tối nhên tuăn tơmiât tơ’noăng pâ nhoăm tơnêi têa dêi Pôa Hồ Chí Minh, Kăn xiâm hnê ngăn tơnêi têa ƀă tơdroăng hmâ pêi pro dêi ton nah “ hơ-ui kơ vâi môi tiah hơ-ui dêi tơná’’, ‘nâi hơ-ui kum dêi rơpó cho tơdroăng pêi pro ki lĕm tro dêi hdroâng mơngế pin, pôa Nguyễn Xuân Phúc, Kăn xiâm hnê ngăn tơnêi têa tối phiu ro ƀă ƀriê phoih tung hiâm mơno chiâng lo têa mâ châ ’nâi troh tơdroăng hơ’muăn “Tung tơdroăng rêh ối rêm hâi” dêi mâu ngế ki ai hiâm mơno lĕm, pêi tơdroăng cheăng lĕm tung tơdroăng “Cheăng pêi tơdrăng lĕm”.

Kăn xiâm hnê ngăn tơnêi têa tối nhên Đảng ƀă Tơnêi têa pin đi đo tơmâng  tŏng kum ăm mâu ngế ai hnoăng tơnêi têa, mâu kơtiê, mâu ngế chó chêng plôm mâ, mâu ngế hiăng krâ pá ai ivá tung pơlê pơla, ôh tá lôi vâi pá rŏng, Tơdrêng amê, veăng ai mâu ki tuăn mơno lĕm ‘nâi pâ hơ-ui kơ mâu ki ê, tơdroăng ki veăng kum mê tơ tơdroăng ki nhoăm tung rêh ối, veăng ‘no hnoăng tơbleăng tơdroăng rêh ối lĕm tro, hiâm mơno lĕm, dêi mơngế Việt Nam, ‘nâi hơ-ui pâ dêi rơpó.