VOV4.Xơ Đăng - Klăng leh tơbâ 47 hơnăm hâi Ƀlêi trâng rơnó Hơngui 30/4, pôa Nguyễn Xuân Phúc, Kăn xiâm hnê ngăn tơnêi têa hiăng trâm mâ khu hok tro peăng Hdroh a tơnêi peăng Kơnhŏng tơnêi têa a Hngêi hôp kân Thống Nhất (Pơlê kong kân Hồ Chí Minh). Pơtối khôi túa ƀlêi trâng dêi mâu rơxông hok tro peăng Hdroh prôk hdrối, hok tro peăng Hdroh tơnêi têa prôk kơ’nâi hiăng đi đo mơ-eăm pơtâp, châ Đảng loi tơngah, châ kuăn pơlê hâk nhoăm.

Chât ngế cho Kăn cheăng tung Khu pơkuâ xiâm Đảng pôu râng hnoăng cheăng xiâm dêi mâu khu xiâm, kơvâ cheăng a Tơnêi têa. Ki rơhêng vâ tối, a rơxông pơ’lêh nếo tâi tâng tơnêi têa, hên ‘’ngế ki rơkê’’ hiăng châ mơnhên inâi dêi tơná tung mơnhông mơdêk, pro kro mơdrŏng ăm tơnêi têa.

Pôa Nguyễn Xuân Phúc mơnhên, mâu rơxông hok tro peăng Hdroh mơhé pôu râng hnoăng cheăng ki lâi, a tíu ki lâi xuân đi đo loi tơngah ƀă Đảng, ƀă Tơnêi têa, pâ vế hnoăng dêi Đảng, dêi Pôa Hồ ƀă pâ vế tung hiâm mơno mâu tơdroăng tuăn pâ, tơdroăng ki pleăng hnoăng cheăng, kum ăm dêi pó dêi kuăn pơlê peăng Kơnhŏng tơnêi têa.

A Sa Ly tơplôu ƀă tơbleăng