VOV4.Xơ Đăng - Klăng hâi mơhno túa lĕm tro mâu hdroâng kuăn ngo Việt Nam lơ 19/4, kơxo lơ 19/4, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa trâm mâ Khu râ kăn ai 92 ngế krâ pơlê, kăn pơkuâ pơlê, ngê̆ nhân mơngế hdroâng kuăn ngo ki kơhnâ rơkê ai veăng kum hên tung tơdroăng rak ‘măn, rak vế, mơnhông khôi túa lĕm tro mâu hdroâng kuăn ngo.

Xông tơpui a roh trâm mâ, pôa Nguyễn Xuân Phúc, Kăn xiâm hnê ngăn tơnêi têa mơnhên tơdroăng rak ngăn, mơnhông tơdroăng rêh ối tơmeăm khoăng ƀă hiâm mơno ăm vâi krâ mâu hdroâng kuăn ngo rế hía rế châ tơmâng ƀă pơ’lêh nhên, ki rơhêng vâ tối cho mâu tơdroăng tơkêa bro, troăng hơlâ rak vế ƀă mơnhông ki kơnâ khôi túa lĕm tro dêi mâu hdroâng kuăn ngo nhŏng o, ngăn khôi túa lĕm tro mâu hdroâng kuăn ngo cho môi tơmeăm ki ôh tá păng lôi dêi khôi túa lĕm tro Việt Nam.

Kăn xiâm hnê ngăn tơnêi têa trâm mâ krâ pơlê, kăn pơkuâ pơlê, ngê̆ nhân mơngế hdroâng kuăn ngo ki kơhnâ rơkê 

Kăn xiâm hnê ngăn tơnêi têa pói vâ krâ pơlê, kăn pơkuâ pơlê, ngê̆ nhân, mâu ngế ki kuăn pơlê loi tơngah pơtối djâ troăng ahdrối ăm kuăn ‘nĕng cháu chái ƀă pơlê pơla; cho xiâm kối ki kal tung mâu tơdroăng pêi pơlê, pơtối mơhnhôk vâi krâ hdroâng kuăn ngo mơnhông mơdêk khôi túa lĕm tro, mơ-eăm, rŭm môi tuăn. Xua tiô Kăn xiâm hnê ngăn tơnêi têa, ing tơdroăng ki tơdjâk dêi khôi túa lĕm tro, kô tơ’lêi hlâu achê, hlê plĕng ƀă pâ nhuô̆m dêi pó, kum tung ivá ó rơdêi Việt Nam, ki kơnâ Việt Nam ăm hâi kố ƀă la ngiâ.

A Sa Ly tơplôu [ă tơbleăng