Kăn xiâm hnê ngăn tơnêi têa Võ Văn Thưởng veăng ƀă xông tơpui hnê mơhno. Hơnăm 2023 cho hơnăm hên tơdroăng ki kơnâ, môi hơnăm kơdrâm kơdrĕng tơdroăng tơbleăng, kum tung tơdroăng pêi cheăng dêi Kăn xiâm hnê ngăn tơnêi têa, Kăn xiâm phŏ hnê ngăn tơnêi têa pêi pro mâu hnoăng cheăng tung tơnêi têa ƀă a kong têa ê râ Tơnêi têa.

Kăn ƀô̆, đảng viên, mơngế pêi cheăng Ƀơrô Kăn xiâm hnê ngăn tơnêi têa hiăng hlê plĕng, pêi pro châ tơƀrê hiâm mơno hnê mơhno ƀă mâu mơ-éa hnê mơhno dêi râ kăn kơpêng, đi đo mơ-eăm, tơkâ hluâ pá puât, mơdêk hnoăng cheăng, rak pêi cheăng tiô pơkâ, kêi đeăng hôm păng ‘nâng hnoăng cheăng pêi cheăng hơnăm 2023.

Xông tơpui a hneăng hôp, Kăn xiâm hnê ngăn tơnêi têa Võ Văn Thưởng tối tung hơnăm 2024, Ƀơrô Kăn xiâm hnê ngăn tơnêi têa pêi pro tiô troăng: Rŭm môi tuăn, pơkâ, hbrâ, chôa ‘lâng, dâi lĕm tung pêi pro hnoăng cheăng tơdah Kăn xiâm hnê ngăn tơnêi têa ƀă Kăn xiâm phŏ hnê ngăn tơnêi têa tơniăn lĕm má môi um méa teăng mâ tơnêi têa.