VOV4.Xơ Đăng - Klăng roh leh tơbâ 68 hơnăm Ƀlêi trâng Điện Biên Phủ (7/5) hâi hnah, lơ 18/5, a pơlê kong kơdrâm Điện Biên Phủ, kong pơlê Điện Biên, pôa Nguyễn Xuân Phúc, Kăn xiâm hnê ngăn tơnêi têa veăng leh ƀă pêi pro leh phiu ro hiăng mơjiâng pro kêi đeăng tíu koh tơbâ mô đô̆i hlâ tung tơplâ xâ nah a Tíu tơplâ xâ Điện Biên Phủ ƀă mơhnhôk tơdroăng mơjiâng pro hngêi tuăn pâ, kum tơdroăng rêh ối pơlê pơla.

Kăn xiâm hnê ngăn tơnêi têa veăng Leh phiu ro hiăng mơjiâng pro kêi đeăng tíu koh tơbâ mô đô̆i hlâ tung tơplâ xâ a tíu tơplâ Điện Biên Phủ

Xông tơpui a roh leh, pôa Nguyễn Xuân Phúc, Kăn xiâm hnê ngăn tơnêi têa mơhno hiêm mơno tơbâ ƀă mơhno hiêm mơno pâ mơnê hnoăng kân kĭn ôh tá kâi tối troh Pôa Hồ Chí Minh; tơbâ Đăi tươ̆ng Võ Nguyên Giáp, tơdrêng amê troh tá ah pâ mơnê hnoăng kân kĭn dêi mâu kăn tươ̆ng, kăn ƀô̆ mâu lêng, droh rơtăm djâ troăng ahdrối, yân công, khu lêng ƀă kuăn pơlê lâp tơnêi têa hiăng khên tơnôu tơplâ, hlâ tung tơplâ, chiâng châ ƀlêi trâng Điện Biên Phủ troh lâp lu. Mơnhên Đảng, Tơnêi têa đi đo tơmâng hnê mơhno pêi pro tơtro tơdroăng ‘’Pâ mơnê hnoăng kân kĭn’’, ‘’Ô têa pâ kơnhŏng’’ ƀă mâu troăng pơkâ pêi, troăng hơlâ, Kăn xiâm hnê ngăn tơnêi têa tối, Tơmeăm Tíu koh tơbâ mô đô̆i hlâ tung tơplâ xâ vâ tơkŭm mơhúa mâu mô đô̆i hlâ tung tơplâ xâ nah a tơnêi Điện Biên, kô cho tíu pêi pro mâu tơdroăng loi tĭng, tơbâ hnoăng mâu ngế hiăng hlâ, pleăng ivá châ chăn tơná ăm Tơnêi têa.

A Sa Ly tơplôu ƀă tơbleăng