VOV4.Xơ Đăng - Kơmăng lơ 14/6, kong pơlê Quảng Bình tơkŭm po Leh tơbleăng hnoăng Pôa Hồ ƀă tơdroăng ngê̆ thuât leh tơbâ 65 hơnăm hâi Pôa Hồ ‘na lăm pôu Quảng Bình. Xông tơpui a roh leh, pôa Nguyễn Xuân Phúc, Kăn xiâm hnê ngăn tơnêi têa tối nhên: Quảng Bình cho kơpong tơnêi krih tơviah mơjiâng mâu ngế rơkê cho tíu tơkŭm hên tơdroăng ki lĕm má môi hên khôi túa lĕm tro kân dêi hdroâng kuăn ngo. Kơtăn kố 65 hơnăm, hâi 16/6/1957, Pôa Hồ hiăng mot lăm pôu Quảng Bình.

Ahdrối veăng leh tơbâ, pôa Nguyễn Xuân Phúc, Kăn xiâm hnê ngăn tơnêi têa chôu nhâng tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng ƀă mâu lêng khên tơnôu tung tơplâ xâ

Tung 65 hơnăm pêi pro rơkong hnê dêi Pôa Hồ, ki má lối cho lối 35 hơnăm pêi pro troăng hơlâ pơ’lêh nếo, kơpong tơnêi tro hên ƀom ‘mrâm pháu xua tơplâ xâ hiăng mơ-eăm xông rơdêi. Đảng ƀô̆, khu lêng ƀă kuăn pơlê Quảng Bình hiăng rŭm môi tuăn, mơ-eăm tâi ivá, châ mâu tơdroăng kân kĭn a tâi tâng mâu kơvâ. Mâu tơdroăng ki châ tơƀrê cho hâk phiu păng ‘nâng, mơjiâng krá tơniăn ăm kong pơlê Quảng Bình mơnhông mơdêk rĕng ƀă krá tơniăn tâ tung la ngiâ. A leh tơbâ, mâu kăn teăng mâ ƀă kơdrâm mâu râ kuăn pơlê châ ngăn mâu tơdroăng ngê̆ thuât ki má môi ‘’Pâ rơtế ƀă Pôa Hồ mơ-eăm troh tá ah’’.

            A Sa Ly tơplôu ƀă tơbleăng