Kơmăng lơ 2/11, a Hà Nội, Khu pơtâng tối tơdroăng kal tơnêi têa ƀă Rơ’jíu Um tơvi Việt Nam tơrŭm tơkŭm po tơdroăng trâm mâ tơpui tơno ki má môi lâp tơnêi têa 2023 “Hồ Chí Minh – Troăng pói tơngah 2023” ƀă dó inâi: Tơdroăng loi tơngah ƀă Pói vâ. Kố cho tơdroăng pêi tiah hmâ rêm hơnăm vâ pơ-ô, mơhnhôk mâu khu pú hên, ngế krê ki má môi tung hriâm tâp ƀă pêi tiô troăng tơdjâ, hiâm mơno, troăng pêi Hồ Chí Minh. Ƀă dó inâi Tơdroăng loi tơngah ƀă pói vâ, Tơdroăng pê pro dêi Hồ Chí Minh – Troăng prôk pói vâ 2023 mơnhên tơdroăng ki loi tơngah, bâ eăng troăng tơmiât, troăng prôk kăch măng ki Đảng, Pôa Hồ bă tâi tâng kuăn pơlê pin hiăng rah xo.

A tơdroăng pêi, pôa Võ Văn Thưởng, Kăn xiâm hnê ngăn tơnêi têa ƀă pôa Nguyễn Trọng Nghĩa, Kăn xiâm pơkuâ tơdroăng pơtâng tối tơdroăng kal hiăng diâp reăng ăm mâu ngế ki kơhnâ rơkê má môi veăng tơdroăng pêi pro.