Kăn xiâm hnê ngăn tơnêi têa Võ Văn Thưởng teăng mâ kăn pơkuâ Đảng, Tơnêi têa pơtroh rơkong rơkâu troh ƀok xối kân Giuse Nguyễn Chí Linh - Ƀok xối kân pơkuâ Tổng Giáo phận Huế rơtế ƀă mâu ngế ki pơkuâ tung hngêi Pâ Xeăng, mâu ngế ki kum cheăng ƀă tâi tâng kuăn pơlê tiô khôp Pâ Xeăng rơkong rơkâu hâi Pâ Xeăng chu chiâng kuăn mơngế ƀă hơnăm nếo 2024 hơniâp ro, tơniăn lĕm ‘na mơhúa.

Tối nhên Đảng, Tơnêi têa đi đo môi hiâm mơno pêi pro troăng hơlâ tŏng kum rak tơniăn ƀă nhuô̆m tơdroăng ki loi tĭng, tiô khôp dêi kuăn pơlê, tung mê ai ai kuăn pơlê khôp Pâ Xeăng, Kăn xiâm hnê ngăn tơnêi têa Võ Văn Thưởng ăm ‘nâi Đảng ƀă Tơnêi têa đi đo mơ-eăm tŏng kum pro tơ’lêi hlâu vâ kuăn pơlê khôp Pâ Xeăng rêh ối lĕm ‘na châ tro ‘na mơhúa, ai pơxúa ăm pơlê pơla, xua tơdroăng mơnhông kro mơdrŏng dêi tơnêi têa.

A rôh trâm mâ, ƀok xối kân Giuse Nguyễn Chí Linh tơngah ƀă troăng hơlâ dêi Đảng, Tơnêi têa, kuăn pơlê khôp Pâ Xeăng Việt Nam tối tơdjuôm ƀă Tổng Giáo phận Huế tối krê kô mơdêk tâ nếo ki ai hlâu, ki rơdêi dêi tơná; veăng kum hên tâ nếo ăm tơdroăng cheăng mơnhông ƀă mơjiâng tơnêi têa tung la ngiâ.