Xông tơpui a roh trâm mâ, Ƀok xối kân Juse Nguyễn Chí Linh, Tíu xiâm pơkuâ ngăn tơdroăng khôp Pâ Xeăng khu kong pơlê Huế mơnê ƀă phiu ro châ tơdah Kăn xiâm hnê ngăn tơnêi têa ƀă khu râ kăn troh lăm pôu Hngêi khôp kân Tíu xiâm pơkuâ ngăn tơdroăng khôp Pâ Xeăng khu kong pơlê Huế, rơkâu Pâ Xeăng chu chiâng kuăn mơngế ƀă kuăn khôp a Tíu xiâm pơkuâ ngăn tơdroăng khôp Pâ Xeăng khu kong pơlê Huế.

Ƀok xối kân Juse Nguyễn Chí Linh kheăn kơdeăn păng ‘nâng tơdroăng châ tơƀrê hên ing mâu roh lăm a kong têa ê pêi cheăng dêi Kăn xiâm hnê ngăn tơnêi têa Võ Văn Thưởng tung hơnăm 2023; teăng mâ Tơnêi têa Việt Nam trâm mâ, pêi cheăng ƀă Kăn xiâm kong têa dêi hên kong têa ki kân; kum kal khât mơdêk tíu pêi cheăng Việt Nam tung lâp plâi tơnêi.

“Krê ƀă kuăn khôp Pâ Xeăng Việt Nam, roh lăm pôu pêi cheăng Vatican ƀă trâm mâ Ƀok Papa Francis dêi Kăn xiâm hnê ngăn tơnêi têa Võ Văn Thưởng cho môi troăng prôk loi tơngah khât ƀă pêng tơdroăng loi tơngah. Ki rơhêng vâ tối, kuăn khôp Pâ Xeăng a Huế kơnôm roh lăm pôu kố thăm phiu ro tâ mê nếo drêng vâi tơmiât mơni môi hâi ôh tá hơngế vâi kô châ tơdah Ƀok Papa Francis a tơnêi Pâ Xeăng La Vang. Ƀă á, pakĭng tơdroăng phiu ro nếo tối kơpêng mê, á môi tuăn ‘nâi ‘na tơrŭm cheăng pơla mâu khu cheăng pơlê pơla ƀă kuăn khôp Pâ Xeăng rêm roh thăm hơtô, rêm roh thăm tơrŭm rơdêi păng ‘nâng, rêm roh thăm achê pâ dêi pó hên tâ’’.

Phiu ro troh lăm pôu Hngêi khôp kân Tíu xiâm pơkuâ ngăn tơdroăng khôp Pâ Xeăng khu kong pơlê Huế tung tơdroăng achê Hâi tĭng kân Pâ Xeăng chu chiâng kuăn mơngế, Kăn xiâm hnê ngăn tơnêi têa Võ Văn Thưởng pơtroh rơkong rơkâu lĕm tro dêi Khu râ kăn xiâm pơkuâ hnê ngăn Đảng, Tơnêi têa troh Ƀok xối kân Juse Nguyễn Chí Linh, Tíu xiâm pơkuâ ngăn tơdroăng khôp Pâ Xeăng khu kong pơlê Huế; mâu ƀok xối, ƀok moan ƀă kuăn khôp Pâ Xeăng Tíu xiâm pơkuâ ngăn tơdroăng khôp Pâ Xeăng khu kong pơlê Huế tơdah môi rơnó Pâ Xeăng chu chiâng kuăn mơngế hơtô ro, tơniăn lĕm, phiu niu; môi hơnăm nếo tơniăn lĕm, hơniâp ro păng ‘nâng.

‘Na tơdroăng cheăng dêi tơnêi têa, Kăn xiâm hnê ngăn tơnêi têa tối ăm ‘nâi, hơnăm 2023 tơnêi têa châ tơƀrê má môi châ lâp plâi tơnêi kheăn kơdeăn, tung mê ai tơdroăng veăng kum kal khât dêi pơlê pơla kuăn khôp lâp tơnêi têa. Ƀă troăng ‘’Rêh ối lĕm tung hiâm mơno hdroâng mơngế vâ kum hơniâp lĕm ăm vâi krâ kăn pơlê’’, kuăn khôp Pâ Xeăng hiăng thăm veăng mâu tơdroăng tơ’noăng pâ nhuô̆m tơnêi têa xua Măt trâ̆n Tơnêi têa Việt Nam ƀă mâu khu tơrŭm cheăng rêm râ mơhnhôk; ki rơhêng vâ tối cho má môi cho tơdroăng tŏng kum pơlê pơla, tŏng kum mơngế hliăng tiâ pá puât, khăm pơlât, hnê hriâm, djâ hiâm mơno tuăn pâ, kum troh ƀă kuăn pơlê ki má lối cho khu ôh tá ai ivá tung pơlê pơla môi tiah: vâi hdrêng kơtiê, ôh tá ai tíu tơngah; mơngế krâ ôh tá ai kuăn ‘nĕng rak ngăn, mơngế tro tâ pơreăng HIV/AIDS ƀă hên hĕng mâu tơdroăng ki ê.

Kăn xiâm hnê ngăn tơnêi têa Võ Văn Thưởng xuân hiăng kĭ kơthơ krếo Ƀok Papa Francis troh lăm pôu a Việt Nam; pói vâ pơlê pơla kuăn khôp Pâ Xeăng Việt Nam rơtế tơrŭm ƀă mâu kơ koan Tơnêi têa vâ rĕng ai roh châ tơdah ƀok Papa troh lăm pôu:

‘’Á pâ tung hlá kô thơ dêi Ƀok Papa Francis pơtroh kuăn khôp Pâ Xeăng Việt Nam drêng á ai roh lăm pôu troh Hngêi khôp xiâm, tơpui tơno ƀă Ƀok Papa, ai môi rơkong tơpui, hiâm mơno koh nhoăm Pâ Xeăng ƀă hiâm mơno hâk pâ kuăn mơngế cho péa pâ ngiâ dêi môi xu kâk liăn. Ƀă á xuân pâ tung hlá mơ-éa Ê-biang hiăng hnê ai chêh rak ngăn kuăn pơlê tơná xuân cho môi troăng hâk pâ tiô Pâ Xeăng. Á hlo kuăn khôp Pâ Xeăng dêi Tíu xiâm pơkuâ tơdroăng khôp Pâ Xeăng khu kong pơlê Huế tung pơla kố nah hiăng pêi pro lĕm tro hnoăng nhuô̆m Pâ Xeăng, hâk pâ kuăn pơlê, ing mê mơdêk tơdroăng mơnhông cheăng kâ – rêh ối pơlê pơla dêi kơpong, tơnêi têa, kum ăm tơdroăng rêh ối dêi kuăn pơlê rế hía rế lĕm tro tâ’’.

Kăn xiâm hnê ngăn tơnêi têa Võ Văn Thưởng tối nhên, a Hneăng hôp má tơheăm, Khu xiâm pơkuâ tơnêi têa hiăng tơbleăng pơkâ ‘na pơtối mơnhông khôi túa vâi krâ nah, ivá rơdêi rŭm môi tuăn tâi tâng hdroâng mơngế, mơjiâng tơnêi têa rế hía rế mơnhông tơtêk, hơniâp lĕm. Pơkâ mơnhên, rŭm môi tuăn tâi tâng hdroâng mơngế cho khôi túa vâi krâ nah ki kơnía dêi hdroâng mơngế Việt Nam; cho troăng pêi ton xŏn ki kal đi đo dêi Đảng, cho xiâm kố ivá rơdêi dêi hdroâng mơngế.

Kăn xiâm hnê ngăn tơnêi têa tối, vâ tiah mê kal ai tơdroăng rŭm môi tuăn tung kuăn pơlê, rŭm môi tuăn pơla ngế tiô khôp ƀă mơngế ôh tá tiô khôp, pơla mơngế tiô khôp kố ƀă mơngế tiô khôp ki tá; rŭm môi tuăn pơla mơngế Việt Nam tung tơnêi têa ƀă Việt Nam rêh ối a kong têa ê. Ing hiâm mơno mê, Kăn xiâm hnê ngăn tơnêi têa pói vâ ƀă hnoăng cho Ƀok xối kân Tíu xiâm pơkuâ ngăn tơdroăng khôp Pâ Xeăng khu kong pơlê Huế, Ƀok xối kân Juse Nguyễn Chí Linh kô pơtối hnê mơhno, mơhnhôk kuăn khôp Pâ Xeăng Tíu xiâm pơkuâ ngăn tơdroăng khôp Pâ Xeăng khu kong pơlê Huế pơtối mơnhông hiâm mơno nhuô̆m Pâ Xeăng, pâ nhuô̆m tơnêi têa; Koh nhoăm Pâ Xeăng ƀă pâk kuăn pơlê vâ rế hía rế ai hên mâu tơdroăng cheăng lĕm tá ‘na hiâm mơno ƀă tá ‘na châ; tơdjuôm ivá mơjiâng tơnêi têa rế hía rế mơnhông ƀă hơniâp lĕm.