Tung chôu phut sôk ro tơrŭm tơrôa, Kăn xiâm hnê ngăn tơnêi têa Võ Văn Thưởng mơnê mâu ngế tung Khu tơrŭm cheăng  Kuô̆k hô̆i Nhuk - Việt hiăng tơmâng khât, ‘măn hên tơdroăng tơrŭm tơrôa, tơdrăng khât ăm tơnêi têa ƀă kuăn pơlê Việt Nam hiăng ai hên hnoăng veăng ‘no, pêi cheăng tơ ƀrê ăm tơdroăng mơnhông mơdêk tơrŭm cheăng péa tơnêi têa.

Mơhno ki tơrŭm pơla péa tơnêi têa ai hên ki tơngah vâ châ hên rôh tơ ƀrê tâ nếo tung la ngiâ, Kăn xiâm hnê ngăn tơnêi têa Võ Văn Thưởng  pơkâ thế Kăn xiâm khu tơrŭm Kuô̆k hô̆i pơtối tơmâng khât tâ, mơdêk tơrŭm cheăng pơla péa Kuô̆k hô̆i , pơtói tơkŭm hên mâu kăn Kuô̆k hô̆i lăm pôu Việt Nam, mơdêk trâm mâ khu kăn kuô̆k hô̆i, mâu kăn hơnăm ối nếo, mâu kăn kuô̆k hô̆i péa tơnêi têa; pơtối pêi hnoăng cheăng cho kông ki tơdjêp dêi mâu Khu tơrŭm cheăng, hlối mơdêk tơrŭm tung mâu kơvâ cheăng ki nếo pơ’lêh kơxô̆ , pơ’lêh ngiêt lĕm krúa, pêi chiâk xúa kơmăi ki dâi lĕm, hnê hriâm, pêi cheăng ƀă ôm hyô ...