A roh tơdah, Kăn xiâm hnê ngăn tơnêi têa Võ Văn Thưởng tối rơdêi, Việt Nam nhuô̆m tơrŭm cheăng tiô khôi vâi krâ nah nhŏng o, Khu tơrŭm cheăng ton xŏn Việt Nam – Rusi, loi tơngah roh lăm pôu pêi cheăng dêi Kăn xiâm pơkuâ kong pơlê Kaluga kum mơdêk tơrŭm cheăng péa tơnêi têa rế hía rế krá tơniăn, châ tơƀrê tâ.

Kăn xiâm hnê ngăn tơnêi têa Võ Văn Thưởng môi tuăn ƀă Kăn xiâm pơkuâ kong pơlê Kaluga ‘na tơmeăm ki ai hlâu tơrŭm cheăng péa pâ ối kân, ki má lối cho tung kơvâ tê mơdró ƀă mơ’no liăn cheăng. Ƀă tơrŭm cheăng nhŏng o pơla kong pơlê Kaluga ƀă Bình Thuận, Kăn xiâm hnê ngăn tơnêi têa pói vâ péa kong pơlê ai hên troăng mơdêk tâ mê nếo tơrŭm ‘na ôm hyô, ki má lối cho drêng Bình Thuận ai loăng pơlái kong kế, têa kơxĭ lĕm ƀă hên tíu troh ôm hyô ai kơƀâng chêh ƀă nâl kong têa Rusi.