Rôh trâm mâ châ tơkŭm po vâ pêi pro tơdroăng troh leh tơbâ 20 hơnăm mơjiâng pơlê kong kân Cần Thơ dêi tíu xiâm tơnêi têa (01/01/2004 – 01/01/2024). Mâu ngế ki rơkê châ pơ-eăng, khĕn kơdeăn rôh kố cho mâu ngế ki rơkê, châ rah xo ing râ cheăm, tơring kong pơlê troh pơlê kong kân, teăng mâ ăm tâi tâng mâu kơvâ cheăng ƀă mâu  pơlê pơla ki ai hên hnoăng veăng ‘no tung mơnhông cheăng kâ-rêh ối pơlê kong kân Cần Thơ ing mâu hơnăm hdrối mê hía nah.

Kăn xiâm hnê ngăn tơnêi têa Võ Văn Thưởng tối pơchân, tung pơla mơnhông, Cần Thơ thế đi đo ngăn kuăn pơlê cho xiâm. Đảng ƀô̆, mâu kăn rêm râ thế rơtế hmâ khât, tơleăng tơdroăng ki pá, tơvâ tơvân, tơdroăng tô tuăn dêi kuăn pơlê. Xua “pơkâ mơnhông mơdêk thế pro ăm tơdroăng hơniâp ro ăm kuăn pơlê’’. 

Tơdrêng amê cho mơdêk tâ nếo mâu tơdroăng tơ’noăng pâ nhoăm tơnêi têa ing mê vâ hên tâ nếo mâu ngế ki rơkê veăng pêi cheăng kơhnâ, veăng ‘no hên hnoăng tâ nếo ƀă tơdroăng ki kal tâ nếo ăm tơdroăng mơnhông pơlê kong kân tung la ngiâ.