A roh trâm mâ tơpui tơno, tung tơdroăng nhŏng o, achê tuăn pâ ƀă loi tơngah, Kăn xiâm hnê ngăn tơnêi têa Võ Văn Thưởng ƀă Ngế pro xiâm hnê ngăn kong têa Nhuk Kishida vêh tối tơrŭm cheăng péa tơnêi têa tung 50 hơnăm hiăng hluâ ƀă tối môi tuăn ‘na tơdroăng mơnhông rơdêi, tâi tâng, păng ‘nâng tung tâi tâng kơvâ cheăng dêi tơrŭm cheăng péa tơnêi têa. Ing tơdroăng tơrŭm nếo, péa Kăn xiâm pơkuâ hiăng môi tuăn ‘na troăng pêi kân ƀă mâu troăng vâ pro trâu hơhngế tơrŭm cheăng pơla péa tơnêi têa, pơtối pêi pro châ tơƀrê mâu troăng tơpui tơno tơrŭm cheăng hiăng ai pơla mâu khu xiâm, kơvâ cheăng péa tơnêi têa ƀă mơdêk mơjiâng mâu troăng pêi cheăng nếo; thăm tơrŭm păng ‘nâng, châ tơƀrê tung kơvâ cheăng lêng tiô Tơbleăng troăng tơmiêt la ngiâ tơdjuôm ‘na tơrŭm cheăng lêng Việt Nam – Nhuk.

‘Na tơrŭm cheăng kâ, péa kăn xiâm pơkuâ môi tuăn pơtối thăm tơrŭm cheăng kâ pơla péa tơnêi têa, mơdêk tơrŭm cheăng vâ tơniăn gâk kring cheăng kâ ƀă po rơdâ tơrŭm cheăng tung mâu kơvâ nếo môi tiah pơhlêh nếo tơmiêt pêi rơkê, hnê kŏng nghê̆, pơhlêh xúa kŏng nghê̆, pơhlêh pêi cheăng krúa lĕm kong prâi ƀă hía hé.