Tơpui a rôh pêi cheăng, Kăn xiâm hnê ngăn tơnêi têa Võ Văn Thưởng mơnhên tối khât mâu tơdroăng ki pêi klêi ƀă mơnhông ‘na rêm kơvâ cheăng dêi Lưh đoân tung mâu hơnăm achê kố, malối cho hnoăng cheăng hnê hriâm, hbrâ rơnáu tơplâ, tơxâng cho môi tung mâu tíu pêi cheăng pêi pro hbrâ rơnáu hdrối tung khu lêng tơplâ dêi khu lêng tơmâng tong ‘na tơdroăng cheăng lêng.

Kăn xiâm hnê ngăn tơnêi têa tơngah, kăn ƀô̆, mâu ngế cheăng, khu lêng Lưh đoân kô pơtối veăng kum rơtế ƀă tâi tâng kơvâ cheăng lêng tơmâng tong tơdroăng cheăng lêng, tơƀrê tâ nếo ăm tơdroăng cheăng mơjiâng ƀă rak vế Tơnêi têa tung chal nếo; pơtối tơxâng cho khu lêng ki loi tơngah khât, tơdrăng dêi Đảng, Tơnêi têa, Khu lêng ƀă kuăn pơlê.

Drêng kố, Kăn xiâm hnê ngăn tơnêi têa Võ Văn Thưởng rơkâu kăn ƀô̆, lêng Lưh đoân Trinh sát đặc nhiệm K3 ivá rơdêi, hơniâp ro; tơdrêng amê hlối tối tơngah Lưh đoân Trinh sát đặc nhiệm K3 tối krê, Khu xiâm ngăn lêng tơmâng tong kơpong II tối tơdjuôm đi đo pêi klêi khât hnoăng cheăng châ pơcháu, tơxâng ƀă tơdroăng ki tơngah dêi Đảng, Tơnêi têa ƀă kuăn pơlê.