Tiô rơkong krếo thế dêi Chin phuh mâu kong têa Arab thống nhất UAE ƀă Chin phuh Kŏng hoa Thổ Nhĩ Kỳ, kơxê lơ 28/11, Ngế pro xiâm hnê ngăn Chin phuh Phạm Minh Chính ƀă kơdrâi rơtế khu râ kăn xiâm Việt Nam hiăng troh veăng Hneăng hôp kân pêi tơdroăng ‘na kong prâi lâp plâi tơnêi tung tơdroăng Hneăng hôp roh má 28 rêm pâ veăng Tơkêa dêi Khu lâp kong têa ‘na Kong prâi hơ’lêh COP28, pêi pro mâu tơdroăng pêi cheăng pơla péa pâ a UAE ƀă lăm pôu pêi cheăng kong têa Thổ Nhĩ Kỳ sap hâi lơ 29/11 troh hâi lơ 3/12/2023. Hneăng hôp kân pêi cheăng ‘na kong prâi hơ’lêh lâp plâi tơnêi tơkŭm po tơdroăng Hneăng hôp COP28 cho tơdroăng ki kal hên pâ kal má môi tung hơnăm kong prâi hơ’lêh. Hneăng hôp kân tiô tối hdrối veăng amê ai lối 70.000 kăn teăng mâ troh ing 197 kong têa, EU ƀă rơpâu khu tơrŭm cheăng Chin phuh, khu tê mơdró, khu droh rơtăm ƀă rêm pâ tơdjâk ki ê.

Ki rơhêng vâ tối cho tơdroăng ai mâ dêi lối 100 ngế kăn xiâm, Ngế pro xiâm hnê ngăn Chin phuh mâu kong têa ƀă khu râ kăn pơkuâ mâu khu tơrŭm cheăng lâp plâi tơnêi. Ngế pro xiâm hnê ngăn tơnêi têa Phạm Minh Chính veăng Hneăng hôp kân pêi cheăng ‘na kong prâi lâp plâi tơnêi cho roh vâ Việt Nam mơhno rơdêi tơdroăng pơtâng hnê tối hnoăng, hbrâ, veăng tung tơdroăng tơleăng pơloăng mơnúa tơdjuom lâp plâi tơnêi ‘na kong prâi hơ’lêh; kum pơlê pơl lâp plâi tơnêi hlê plĕng nhên troăng hơlâ, khŏm mơ-eăm ƀă tơdroăng mơ-eăm xuân môi tiah mâu tơdroăng pá puât, pơloăng mơnúa dêi Việt Nam tung hbrâ ví kong prâi hơ’lêh.