Kăn xiâm hnê ngăn Võ Văn Thưởng hiăng pơkuâ ngăn Khu kăn xiâm tơnêi têa Việt Nam hiăng ai roh trâm mâ ƀă ai ƀai tơpui tơno, tung tơdroăng ki xiâm mê cho tối ‘na thăm mơdêk tơrŭm cheăng kâ pơla Ấn Độ Dương - Thái Bình Dương.

Xông tơpui a roh hôp, Kăn xiâm hnê ngăn tơnêi têa Võ Văn Thưởng tối nhên, Hneăng trâm mâ tơrŭm pêi cheăng kâ Ấn Độ Dương - Thái Bình Dương xua tơdroăng vâ mơnhông kro mơdrŏng ƀă kơdo mơ-eăm tơdjuôm cho vâ thăm mơdêk tơrŭm cheăng, tơrŭm mâu kong têa ki pêi cheăng kâ tung pơla tơdroăng rêh ối tung lâp plâi tơnêi dế trâm hên tơdroăng ki hơ’lêh, xahpá, pơloăng mơnúa hên.

Hneăng hôp tơrŭm cheăng kâ Ấn Độ Dương - Thái Bình Dương xua ing tơdroăng pro kro ƀă pói tơngah mê cho túa cheăng tơrŭm, tơdjêp ki tơ’lêi hlâu, châ pơxúa, rak pro tơniăn ăm kuăn pơlê, veăng kum ăm tơdroăng pro hơniâp lĕm, tơniăn ƀă kro mơdrŏng dêi tung kơpong ƀă tung lâp plâi tơnêi.