Xông tơpui a roh trâm mâ mê, pôa Vương Đình Huệ hiăng kơdeăn khĕn hôm khât tơdroăng pơkâ dêi kong pơlê Nghệ An hiăng kĭ pơkâ ‘na tơdroăng mơjiâng khu kố. Riân sap ing hâi châ mơjiâng pro a hơnăm 2009 nah, Khu xiâm ngăn lêng kăch măng hiăng tro rup, ‘nêk mơ’nêa a kong pơlê Nghệ An hiăng tơkŭm, ‘mâi mơnhông tơkŭm dêi khu rế hía rế châ mơnhông mơdêk.

Ƀă hnoăng cheăng “Khoh niân tiah hâi kố, kơnôm ai hnoăng dêi pâ pôa, ngoh nâ sap ing chal hdrối nah”, đi đo chôu vế mơngế ki ai hnoăng kăch măng, Kăn xiâm hnê ngăn Kuô̆k hô̆i vêh mơnhên, Đảng, Tơnêi têa pin koh mơnê ƀă tŏng kum ngăn khât kơ mâu ngế ai hnoăng ƀă kăch măng, tung mê, ai mâu lêng kăch măng tro rup, ro kroăng phak, ‘nêk mơ’nêa.

Tung la ngiâ ah, pôa Vương Đình Huệ pói rơhêng vâ, mâu ngế tung khu pơtối rak vế hnoăng cheăng kăch măng ki khên tơnôu, kơhnâ khât tung tơplâ, krăng, rơkê tung pêi chiâk pêi deăng, pêi cheăng kâ; pêi pro tro tiô hnoăng cheăng pơcháu, ki xiâm dêi khu, pơtối mơdêk hnoăng cheăng tiô khôi hmâ vâi krâ roh nah dêi kăch măng, hơniâp ro veăng kum dêi khu pú, veăng dêi pó mơjiâng tơdroăng rêh ối tiô tơdroăng rêh ối nếo, veăng mơjiâng tơdroăng kring vế, rak ngăn tơniăn dêi tơnêi têa.