VOV4.Xơ Đăng - Klăng leh tơbâ 47 hơnăm hâi tơleăng lĕm peăng Hdroh tơnêi têa, môi tuăn tơnêi têa (30/4) hâi lơ 17/4, jâ Võ Thị Ánh Xuân, Kăn xiâm phŏ hnê ngăn tơnêi têa hiăng troh chôu nhâng, pleăng hơvĭng reăng tơbâ mâu ngoh khên tơnôu hlâ tung tơplâ xâ a Tíu koh tơbâ mô đô̆i hlâ tơplâ xâ nah pơlê krâm Hoài Nhơn ƀă lăm pôu mâu rơpŏng ai hnoăng tơnêi têa tung pơlê kong krâm Hoài Nhơn, kong pơlê Bình Định.

Jâ Võ Thị Ánh Xuân, Kăn xiâm phŏ hnê ngăn tơnêi têa diâp kơxuô tơmeăm ăm rơpŏng ai hnoăng tơnêi têa a bêng Hoài Thanh Tây pơlê krâm Hoài Nhơn

Tung tơdroăng pơ’lêh nếo, Hoài Nhơn tơdah inâi ‘’Ngế khên tơnôu pêi cheăng’’ rơxông pơ’lêh nếo xua Kăn xiâm hnê ngăn tơnêi têa diâp ăm. Rơtế môi hâi, jâ Võ Thị Ánh Xuân, Kăn xiâm phŏ hnê ngăn tơnêi têa hiăng troh lăm pôu, mơhnhôk ƀă diâp kơxuô tơmeăm ăm mâu rơpŏng ai troăng hơlâ tung pơlê kong krâm Hoài Nhơn, kong pơlê Bình Định. Lăm pôu ngăn mâu rơpŏng ai hnoăng tơnêi têa, Kăn xiâm phŏ hnê ngăn tơnêi têa kơ-êng ‘na tơdroăng rêh ối, tơdrêng amê pơkâ khu râ kăn pơkuâ kong pơlê Bình Định pêi pro tro tâ nếo tơdroăng rak ngăn mâu rơpŏng ai troăng hơlâ tŏng kum, mâu ngế ai hnoăng ƀă kăch măng.

A Sa Ly tơplôu ƀă tơbleăng