Kăn xiâm pơkuâ hnê ngăn Đảng tơnêi têa Nguyễn Phú Trọng hiăng hâk mơnê Ngế pro xiâm hnê ngăn kong têa Belarus lăm pôu, pêi cheăng a tơnêi têa Việt Nam ƀă hnối rơkâu kong têa Belarus hiăng châ chiâng pêi pro hên tơdroăng ki ƀlêi chiâng tung pơtối mơdêk tơniăn ‘na cheăng pơkuâ xiâm tơnêi têa, mơnhông tơnêi têa, kring vế rak ngăn tơniăn tơdroăng rêh ối pơlê pơla ƀă thăm mơdêk ivá cheăng dêi kong têa tơná tung kơpong.

Vêh mơnhên tối hnoăng cheăng ki lĕm tro tung hneăng trâm mâ, tơpui tơno pơla Ngế pro xiâm hnê ngăn kong têa Belarus ƀă mâu Khu kăn xiâm dêi tơnêi têa Việt Nam, Kăn xiâm pơkuâ hnê ngăn Đảng tơnêi têa Nguyễn Phú Trọng hâk kơdeăn ‘ló khât mâu tơdroăng cheăng ki châ mơnhông tơniăn tung tơrŭm cheăng pơla Việt Nam ƀă Belarus; klêi mê, mơhno tối hiâm mơno loi tơngah hneăng lăm pôu roh kố kô mơjiâng ivá cheăng ki nếo tung la ngiâ.

Kăn xiâm pơkuâ hnê ngăn Đảng Nguyễn Phú Trọng xuân hiăng tơpui tơno ƀă Ngế pro xiâm hnê ngăn kong têa Belarus Roman Golovchenko mâu troăng hơlâ vâ pêi pro, túa cheăng ki kân vâ thăm mơdêk tơrŭm nhŏng o tiô khôi hmâ pơla péa pâ mơnhông a kơlo ki nếo, hriâm ƀối túa ki rơkê dêi pó tung rêm kơvâ cheăng. Đảng Kŏng san Việt Nam hiăng hbrâ ‘mâi rơnêu, ƀă thăm mơdêk tơrŭm cheăng ƀă Đảng xiâm dêi kong têa Belarus.