Kơxê lơ 13/12, a  tíu pêi cheăng dêi Kăn xiâm hnê ngăn tơnêi têa, Kăn xiâm pơkuâ hnê ngăn Đảng Nguyễn Phú Trọng hiăng pơkuâ leh tơdah kân krip kơ Kăn xiâm pơkuâ ngăn Đảng, Kăn xiâm hnê ngăn kong têa Sinuâ Tập Cận Bình tiô túa leh kân pro ăm mâu kăn xiâm tơnêi têa. Klêi mê, péa ngế kăn tơpui, rơtế hvái ngăn mâu tơdroăng mơnhông tơrŭm pơla péa Đảng, péa tơnêi têa, môi tuăn tơdroăng tối tiah hmâ hlối cho pú hmâ, hlối cho nhŏng o xua Kăn xiâm hnê ngăn tơnêi têa Hồ Chí Minh, Kăn xiâm hnê ngăn Mao Trạch Đông rơtế ƀă mâu kăn xiâm hneăng hdrối ki mơjiâng tơmeăm khoăng kơnía git dêi kuăn pơlê péa tơnêi têa, thế pôi ta la lâi pơtê pơtối rak vế pêi pro.

Péa pâ vâ môi tuăn mơjiâng Kuăn pơlê tối tơdroăng tung la ngiâ dêi Việt Nam - Sinuâ ai pơxúa, mơ-eăm xua tơdroăng hơniâp lĕm xua kuăn pơlê péa tơnêi têa, xua hơniâp lĕm ƀă rơkê plĕng dêi kuăn mơngế, tơtro ƀă Luât pơkâ dêi Khu lâp kong têa ƀă luât lâp plâi tơnêi, tiô pơkâ nhoăm dêi rơpó, tơrŭm ôh tá pơrah rơtế ai pơxúa, nhoăm tơniăn, hnoăng pơkuâ dêi tâi tâng tung tơnêi têa dêi rơpó, mơ-eăm tơleăng mơnhên ki ôh tá môi tuăn dêi rơpó ƀă tơdroăng hơniâp lĕm. Klêi hôp, khu râ kăn, péa Kăn xiâm pơkuâ hnê ngăn Đảng hiăng rơtế séa ngăn ƀă hmâng tơbleăng ‘na 36 tơdroăng chêh tơhrâ tơrŭm cheăng tung hên kơvâ cheăng ki châ kĭ.

Kăn xiâm pơkuâ hnê ngăn Đảng Nguyễn Phú Trọng hiăng nhoăm rơkong krếo thế hlối rơtế ƀă Kăn xiâm pơkuâ ngăn Đảng, Kăn xiâm hnê ngăn kong têa Sinuâ Tập Cận Bình veăng leh ôu têa chế. Péa ngế Kăn xiâm pơkuâ ngăn Đảng  rơtế hmâ tối tơbleăng ‘na mâu tơmeăm khoăng chế ki vâi ô eăng dêi Việt Nam ƀă leh mơnúa ôu têa chế ki xú lĕm dêi mơngế Việt Nam, pakĭng mê mơhno ki lĕm tơ’mô ‘na túa lĕm tro pơla péa kuăn pơlê hdroâng mơngế.

Kơmăng hâi ki mê, Kăn xiâm pơkuâ hnê ngăn Đảng Nguyễn Phú Trọng ƀă kơdrâi Pôa, Kăn xiâm hnê ngăn tơnêi têa Võ Văn Thưởng ƀă kơdrâi pôa  hiăng tơkŭm po ôu kâ kân krip koh hâk Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ Tập Cận Bình ƀă kơdrâi pôa hiăng lăm pôu Kăn xiâm tơnêi têa troh a Việt Nam.