Ngế pro xiâm hnê ngăn kong têa Kul Hun Manet tối phiu ro drêng tơrŭm cheăng Kul – Việt Nam rế hía rế châ krá tơniăn ƀă mơnhông mơdêk tung tâi tâng mâu kơvâ cheăng. Pôa Hun Manet tối tơbleăng ƀă Kăn xiâm pơkuâ hnê ngăn Đảng mâu tơdroăng ki xiâm ‘na tơdroăng cheăng kong têa Kul achê kố, tung mê, ai tơdroăng pêi kêi đeăng tâi tâng khu pơkuâ tơnêi têa, mâu kăn pêi cheăng dêi Kuô̆k hô̆i, Chin phuh hneăng nếo ƀă tơdroăng châ tơƀrê Hneăng hôp ôh tá tối hdrối Đảng CPP xuân môi tiah tơdroăng châ tơƀrê dêi roh hôp tơpui tơno ƀă Ngế pro xiâm hnê ngăn tơnêi têa Phạm Minh Chính.

Péa pâ hiăng tơpui tơno trâu hơngế ‘na tơrŭm cheăng tung hên kơvâ cheăng má môi pơla péa Đảng, tơrŭm ‘na cheăng kâ, cheăng lêng – gâk kring ƀă tơrŭm cheăng pơla péa droh rơtăm péa tơnêi têa. Kăn xiâm pơkuâ hnê ngăn Đảng Nguyễn Phú Trọng tối rơdêi, pái tơnêi têa Việt Nam – Kul - Lếo rŭm môi tuăn, kum dêi pó tơkâ hluâ rêm tơdroăng pá puât, xua mê tung hneăng nếo, péa pâ kal pơtối rak, tơbêng ăm tơrŭm cheăng Việt Nam – Kul rế hía rế mơnhông mơdêk.