Tối tơbleăng a hneăng hôp, Kăn xiâm pơkuâ hnê ngăn Đảng Nguyễn Phú Trọng tối, tung vâ châ 40 hơnăm hơ ‘lêh nếo hdrối kố nah, Đảng pin hiăng pơtối rak vế pêi pro rak túa lĕm tro, xiâm rêi ƀă tơdroăng ki lĕm tro roh ton nah hmâ pêi pro dêi hdroâng mơngế, tơmâng xo mâu tơdroăng ki lĕm rơkê dêi lâp plâi tơnêi ƀă tuăn tơmiât ki rơkê dêi rơxông nôkố, mơnhông tơƀrê tơdroăng tơpui kâ dêi chuh ngiah  Mác- Lênin, tuăn mơno ki lĕm tro Hồ Chí Minh, mơjiâng môi khu xiâm tơpui kâ, tơpui kâ rơkê tơtro ƀă nhên tŭm tơdroăng, pro pơxúa tiô khôi túa lem tro “Xiâm kơlá Việt Nam’’.

Kăn xiâm pơkuâ hnê ngăn Đảng Nguyễn Phú Trọng khĕn kơdeăn 6 tơdroăng tơpui tơƀrê dêi kơvâ cheăng tơpui kâ ƀă Tơpui kâ tá a tung lâp tơnêi têa sap ing klêi kơ’nâi Hôp Tơpui kâ tung lâp tơnêi têa rôh apoăng a hơnăm 2021. Môi tiah pin hiăng tơkŭm po  hnê ƀă tơbleăng pêi tơdrêng, pêi pơxúa troăng rơhlâ tơpui kâ má 13 dêi Đảng.