A rôh hôp, ƀă hiâm mơno tơdrăng, mơdêk hnoăng cheăng pôu râng, mâu kăn tơkŭm tơpui tơno, mơnhên tối klêi kơ’nâi pêi pro hnoăng cheăng lêng, gâk kring ƀă mơjiâng Đảng ƀô̆ Khu lêng hơnăm 2023, hnê mơhno tâi tâng khu lêng ‘mâi mơnhông xơpá, pêi klêi tâi tâng mâu hnoăng cheăng ƀă pêi pro tơƀrê tâ hơnăm 2022, hên hnoăng cheăng pêi klêi rơkê khât.

Tung tơdroăng ki tơpui tối leăng trâu hơngế ‘na tơdroăng tung kơpong, a kong têa ê, tung tơnêi têa, Khu pơkuâ hnê ngăn Đảng lêng tơnêi têa mơnhên mâu hnoăng cheăng, troăng hơlâ ki kal tơkŭm pơkuâ, hnê mơhno pêi pro ƀlêi chiâng hnoăng cheăng lêng gâk kring. Tung mê, pơtối hbrâ rơnáu ‘nâi nhên, mơnhên tối, tối tơbleăng tro tơdroăng, teăm tơdrêng amê hlối tí tăng ‘nâi plĕng ăm Đảng, Tơnêi têa pơkâ tơleăng ƀlêi chiâng mâu tơdroăng, pôi tá tro kơdrâ, rak vế krá rơdêi tơniăn krê, hnoăng pơkuâ, môi tuăn, tâi tâng tơnêi tơníu dêi Tơnêi têa.

Mơdêk hnoăng cheăng kal xiâm tung mơjiâng tơdroăng gâk kring ƀă Tơdroăng pêi pro dêi Chin phuh ‘na mơnhông cheăng kâ rêh ối pơlê pơla, rak vế pơlê pơla cheăm bêng, gâk kring mâu kơpong ƀă kong pơlê ki kal; Tơkŭm pơkuâ mơjiâng Đảng ƀô̆ Khu lêng krá rơdêi.