VOV4.Xơ Đăng - Kơxo lơ 16/5, a tíu pêi cheăng Kăn xiâm, pôa Nguyễn Xuân Phúc, Kăn xiâm hnê ngăn tơnêi têa hiăng pơkuâ roh leh tơdah jâ Katerina Sakellaropoulou, Kăn xiâm pơkuâ kong têa Greco pơxiâm lăm pôu pêi cheăng a Việt Nam sap hâi lơ 15 troh 19/5 tiô rơkong krếo thế dêi pôa Nguyễn Xuân Phúc. Klêi kơ’nâi leh tơdah, péa kăn xiâm pơkuâ kô tơkŭm po tơpui tơno.

Kăn xiâm pơkuâ kong têa Greco lăm pôu pêi cheăng a Việt Nam

Tung roh lăm pôu pêi cheăng, jâ Katerina Sakellaropoulou kô ‘măn hơvĭng reăng a Tíu koh tơbâ mâu ngoh khên tơnôu hlâ tung tơplâ xâ nah; ‘măn hơvĭng reăng ƀă mot ngăn tung hngêi ‘măn poăng Pôa Hồ Chí Minh; Koh trâm mâ tơpui tơno ƀă pôa Nguyễn Phú Trọng, Kăn xiâm pơkuâ hnê ngăn Đảng; trâm mâ tơpui tơno ƀă Pôa Vương Đình Huệ, Kăn xiâm hnê ngăn Kuô̆k hô̆i; veăng Leh kĭ a hlá mơ-éa ki kal ƀă trâm mâ khu chêh hlá tơbeăng; lăm ngăn tíu koh tơbâ Văn Miếu ƀă veăng mâu tơdroăng ki kal dêi pơlê kong kân.

Roh lăm pôu pêi cheăng veăng kum loi tơngah kal kí, pro trâu hơngế tâ tơrŭm cheăng hên troăng môi tiah kal kí, tơpui kâ, cheăng kâ, mơhno khôi túa lĕm tro, ôm hyô, djâ tơrŭm cheăng pơla péa pâ trâu hơngế, châ tơƀrê păng ‘nâng.

A Sa Ly tơplôu ƀă tơbleăng