VOV4.Xơ Đăng - Kơxo lơ 18/4, Khu kăn ki pêi dêi hnoăng cheăng dêi Khu pơtâng tối tơdroăng kal Tơnêi têa pêi cheăng ƀă Khu pơkuâ ngăn Đảng Bình Định ‘na cheăng kâ rêh ối – pơlê pơla ƀă hnoăng cheăng mơjiâng Đảng, ‘na troăng kal kí, hiâm mơno, túa rêh ối ƀă tơdroăng cheăng pơtâng tối tơdroăng kal hơnăm 2021 ƀă sap hneăng má môi hơnăm 2022. Pôa Nguyễn Trọng Nghĩa, kăn xiâm pơkuâ ngăn Đảng, kăn pơtâng tối tơdroăng kal Tơnêi têa pơkuâ po rôh pêi cheăng.

Kăn xiâm pơtâng tối tơdroăng kal Tơnêi têa pêi cheăng ƀă Khu pơkuâ ngăn Đảng Bình Định

Tơpui a rôh pêi cheăng, pôa Nguyễn Trọng Nghĩa mơnhên tối khât mâu tơdroăng ki Đảng ƀô̆ kong pơlê Bình Định hiăng pêi klêi tung pơla hdrối mê hía nah, kố cho tơdroăng, cho ivá vâ pơtối mơdêk, ăm Bình Định mơnhông rơdêi tâ nếo tung la ngiâ. Pôa Nguyễn Trọng Nghĩa pơchân, vâ tí tăng tơƀrê mâu tơdroăng ki hiăng ai hlâu, ki pơxúa dêi Bình Định, pâ thế Khu pơkuâ Đảng, Hô̆i đong hnê ngăn, Vi ƀan hnê ngăn ƀă mâu kơvâ cheăng ki ai tơdjâk, mâu kơ koan, tíu pêi cheăng a kong pơlê athế cho ivá séa ngăn tơdroăng pơkâ Hneăng hôp 13 dêi Đảng, mâu hlá mơ-éa pơkâ thế dêi Tơnêi têa tơtro ƀă tơdroăng pơkâ Hneăng hôp đảng ƀô̆ rêm râ vâ pêi pro.

Katarina Nga tơplôu ƀă tơbleăng