VOV4.Xơ Đăng - Hâi lơ 11/7/2022, Kăn teăng mâ Nhuk a Việt Nam hiăng po trang hlá mơ-éa tơbâ pôa Shinzo Abe, Ngế xiâm pro xiâm hnê ngăn kong têa Nhuk ki hiăng hlâ. Pôa Nguyễn Phú Trọng, kăn xiâm pơkuâ hnê ngăn cheăng Đảng hiăng pơtroh hơvĭng reăng ăm kơ kăn xiâm hnê ngăn Đảng Dân chủ Tự do, Ngế pro xiâm hnê ngăn kong têa Nhuk cho pôa Shinzo Abe hneăng hdrối.

Kăn xiâm Việt Nam troh chêh tung hlá mơ-éa tơbâ Ngế pro xiâm hnê ngăn kong têa Nhuk hneăng hdrối cho pôa Shinzo Abe

Pôa Nguyễn Xuân Phúc, kăn xiâm hnê ngăn tơnêi têa prế pôa Phạm Minh Chính, Ngế pro xiâm hnê ngăn Chin phuh hiăng teăng mâ mâu râ kăn xiâm Việt Nam tối, khéa hơ’nêng ó khât ƀă pơtroh rơkong sĭng khéa khât dêi Đảng, Tơnêi têa ƀă Kuăn pơlê Việt Nam troh Đảng Dân chủ Tự do, Chin phuh, kuăn pơlê Nhuk ƀă rơpŏng hngêi pôa Shinzo Abe. Kăn xiâm Việt Nam tối rơhêng vâ kăn pơkuâ, kuăn pơlê Nhuk ƀă rơpŏng hngêi pôa Shinzo Abe rĕng tơkâ luâ tơdroăng ki châi heăng kố, rơhêng vâ péa tơnêi têa rak vế ƀă mơnhông ta nếo tơrŭm cheăng tơniăn lĕm Việt Nam – Nhuk.

Katarina Nga tơplôu ƀă tơbleăng