VOV4.Xơ Đăng - Kơxê lơ 20/5, a Hneăng hôp ‘na tơdroăng cheăng hriăn plĕng, Hô̆i đông kong pơlê Khánh Hòa hneăng má VII hiăng tơbleăng ăm pêi pro pơkâ ‘na tơkêa xing xoăng kơxô̆ liăn mơ’no mơjiâng pro tơmeăm tơnêi têa hneăng hơnăm 2021 – 2025, ing liăn ngân kong pơlê vâ veăng mơjiâng pro troăng kân ăm phêp rơxế kơtâu têi Khánh Hòa – Ƀuôn Ma Thuột. Tiô tối hdrối, vâ chê 350 rơtal liăn vâ veăng pêi pro tơdroăng tơkêa bro, tơniăn ki vâ iâ 50% kơxô̆ liăn chêl thiăn, tăng tơnêi ƀă kơpong prôk tơkâ hluâ kơpong kong pơlê Khánh Hòa.

Kơxô̆ liăn xing xoăng ki xiâm kô pêi pro tiô hô sơ tơbleăng hriăn plĕng kơxô̆ liăn ki chiâng pêi pro ƀă Tơbleăng hriăn plĕng chiâng pêi pro châ ăm hnoăng kĭ ăm pêi pro. Tơdroăng tơkêa bro mơjiâng troăng kân ki ăm phêp rơxế kơtâu têi Khánh Hòa – Ƀuôn Ma Thuột cho môi tung mâu tơdroăng tơkêa bro ki kal dêi tơnêi têa châ Chin phuh pơkâ thế Kuô̆k hô̆i pơkâ troăng hơlâ mơ’no liăn cheăng tiô troăng mơ’no liăn tơnêi têa.

Tâi tâng ki xŏn troăng kân dâng 117 km ƀă ai 4 troăng rơxế kơtâu ƀă tiô tối hdrối pơxiâm mơjiâng pro hơnăm 2023, kô kêi đeăng hơnăm 2025.

A Sa Ly tơplôu ƀă tơbleăng