Troh nôkố, lâp kong pơlê hiăng mơjiâng 66 Khu hnê mơhno tâ phĭu rah xo kăn pêi cheăng, 66 Vi ƀan Tâ phĭu rơtế mâu tôh gum cheăng; 4 Khu tâ phĭu rah xo kăn teăng mâ Kuô̆k hô̆i, 19 Khu tâ phĭu rah xo kăn teăng mâ Hô̆i đong kuăn pơlê kong pơlê ƀă 387 Khu tâ phĭu rah xo kăn teăng mâ Hô̆i đong kuăn pơlê râ cheăm. Ai 65 cheăm, bêng, kơpong cheăng kâ châ kĭ 1.123 kơpong tâ phĭu tơdâng ƀă 1.123 tôh tâ phĭu rah xo.

Rơtế ƀă tơdroăng séa ngăn inâi mâu ngế ki tâ phĭu, tơdroăng pơtâng tối châ pêi pro rơdâ lâp ing rơ’jíu a cheăm, ƀă mâu khu cheăng Đoân Droh rơtăm, gum mơngế ki tâ phĭu ‘nâi chôu phut, tíu tâ phĭu ƀă tơdroăng pêi pro dêi ngế ki tâ phĭu. Tung măng tĭng pêi cheăng apoăng klêi kơ’nâi Têt Bính Ngọ 2026, Khu pơkuâ Kan sát hiăng pơcháu kơthung tâ phĭu ăm mâu kong pơlê. Ing hâi lơ 26/2 troh 14/3, mâu roh hôp trâm mâ mơngế tâ phĭu châ tơkŭm po tiô tro pơkâ.