VOV4.Xơ Đăng - Kơxo lơ 31/5, Khu ki séa ngăn kơxô̆ 4 dêi Khu hnê mơhno cheăng Tơnêi têa ‘na hbrâ mơdât kâ kơluâ, hiăng pêi cheăng ƀă Khu pơkuâ ngăn Đảng Dak Lak, tơbleăng tơdroăng pơkâ séa ngăn tơdroăng ki kăn pơkuâ, hnê mơhno ƀă khu tơrŭm pêi pro hnoăng cheăng châ hlo, tơdah xo, pơkâ tơleăng tro mâu tơdroăng tối, tơbleăng ‘na mâu ngế ki pro xôi, pâ thế pơsăm tối mâu rôh ki hlo pro xôi ‘na kâ kơluâ, liăn ngân.

Khu hnê mơhno cheăng Tơnêi têa ‘na hbrâ mơdât kâ kơluâ tơbleăng Pơkâ séa ngăn a Khu pơkuâ ngăn Đảng ủy Dak Lak

Tiô túa pơkâ, Khu kăn kố kô pêi cheăng tơdrêng ƀă Khu pơkuâ ngăn Đảng ƀă séa ngăn a 4 tíu pêi cheăng cho Khu pơkuâ ngăn Đảng pơlê kong kơdrâm Ƀuôn Ma Thuột, Viê̆n séa ngăn arak luât kong pơlê, Kŏng an kong pơlê, Khu séa ngăn kong pơlê ‘na tơdroăng mâu tơdroăng; hnoăng cheăng pơkuâ, hnê mơhno dêi khu râ Đảng, khu tơrŭm Đảng ƀă tơdroăng ki hnê tối, tơdah xo, pơkâ tơleăng mâu tơdroăng ki tối ‘na tơdroăng pro xôi, tơkŭm tung mâu kơvâ cheăng ki tơ’lêi kâ kơluâ, hnoăng cheăng châ hlo, pơtroh tơdroăng kal ‘na mâu ngế pro xôi troh mâu kơ koan ki ai tơdjâk.

Malối cho ƀă mâu kơvâ cheăng ki tơ’lêi kâ kơluâ, hnoăng cheăng tơdah, pơkâ tơleăng dêi mâu kơ koan ai hnoăng pơkuâ ƀă tơdroăng tơbleăng ‘na mâu ngế pro xôi; hnoăng cheăng tơrŭm pơla mâu kơ koan ki ai tơdjâk châ hlo, pơtroh, tơdah xo, pơkâ tơleăng mau tơdroăng ki tối ‘na mâu ngế ki pro xôi; tơdroăng pơkâ tơleăng pơsăm tối, pơsăm tơkêng, pơkâ tơleăng mâu tơdroăng ki xôi luât tung hnoăng cheăng châ hlo, pơtroh, tơdah xo, pơkâ tơleăng mâu tơdroăng ki tối ‘na mâu ngế ki pro xôi ƀă hên ki ê.

8.Hneăng hôp khu kăn rôh má 5, hneăng hơnăm 2021 – 2026 dêi Khu hnê mơhnhôk hriâm kong pơlê Dak Lak po a hâi lơ 31/5. Ki xiâm dêi hneăng hôp pơkâ mơ’no tung hơnăm la ngiâ cho pơtối mơdêk hnê mơhnhôk hriâm, hnê mơ’hnhôk tơdroăng rơkê mơjiâng pơlê pơla hriâm tâp. Tung 5 hơnăm hdrối nah, Khu hnê mơhnhôk hriâm kong pơlê Dak Lak hiăng rơtế ƀă kơvâ hnê hriâm rak vế, mơdêk ki rơkê tung hnoăng cheăng hnê chư ƀă hnê phôh câp. Ing mê hiăng mơhnhôk vâ chê 2.500 ngế hok tro ki lo pơtê hriâm, mơhnhôk va chê 1 rơpâu ngế ki ôh tá ‘nâi chư veăng hriâm tung mâu lâm hriâm chư. Tŏng kum mơhnhôk vâ chê 1.600 ngế hriâm veăng hriama tung mâu lâm phôh câ̆p râ má môi, râ má péa. Khu hnê mơhnhôk hriâm mâu tơring, cheăm hiăng mơhnhôk châ lối 122 rơpâu ngế ki hriâm veăng tung lâm hriâm ối tung mâu kơvâ cheăng mơdêk ki rơkê tung rêh ối, mơdêk ki rơkê ƀă tơƀrê tung pêi cheăng, mơdêk ivá kuăn pơlê.

       Katarina Nga tơplôu ƀă tơbleăng