Khu tơ’noăng kơxô̆ 3, tung mê ai tá Khu xiâm hnê mơhno cheăng dêi 13 Khu kăn pơkuâ hnê ngăn Đảng kong pơlê, pơlê kong kơdrâm kơpong Tơdế Tơnêi têa - Tây Nguyên. Xua khu hnê mơhno cheăng dêi Đà Nẵng pro xiâm. Hơnăm 2023, Khu hnê mơhno cheăng pơkuâ hnê ngăn Đảng kong pơlê, pơlê kong kơdrâm hiăng pêi pro nhên khât, mơjiâng tơdroăng pơkâ hnoăng cheăng tung hơnăm, tăng rah, rak vế mâu hnoăng cheăng ki xiâm, ki kal, mơjiâng mâu hnoăng cheăng ki nhên tiô rêm khế, rêm 3 khế môi hdroh vâ ing mê, châ ‘nâi, châ hlo, ‘mâi rơnêu, hnê tối, tơbleăng khĕn, pơkâ pêi pro hnoăng cheăng tro tiô pơkâ, hnoăng pơcháu.

Hnoăng cheăng ‘mâi rơnêu, mơnhông, tơkŭm hnê mơjiâng cheăng Đảng, pơtối tăng rah mơngế mot Đảng cho mâu hnoăng cheăng ki kal châ pêi pro kơhnâ, krâu khât. Mâu kong pơlê, pơlê kong kơdrâm hiăng hơ’lêh nếo tung tơdroăng séa mơnhên ngăn, vêh mơnhên khu ngế đảng viên ăm i tơtro ƀă hnoăng cheăng ki păng ‘nâng, tí tăng mơnhên, séa ngăn, rĕng teăm ‘mâi rơnêu pât mâu tơdroăng ki tá hâi teăm tro, pêi pro kơtăng khât ‘na túa cheăng, tơdroăng tăng rah mơngế rơkê kơhnâ mot pro kăn ƀô̆, đảng viên, rế hía kal athế rế tơtro ki khât păng ‘nâng.