VOV4.Xơ Đăng - Kơxê lơ 25/5, a Hà Nội, Khu râ kăn pêi cheăng kơxô̆ 5 dêi Khu xiâm hnê mơhno hbrâ mơdât kâ kơhveăm liăn ngân, mơdât ‘na tơdroăng ki ôh tá ‘nhó lĕm tro, xua pôa Nguyễn Hòa Bình, Kăn cheăng tung Khu xiâm kal kí, Kăn xiâm pơkuâ hnê ngăn cheăng Đảng, Kăn pơkuâ Hngêi tơleăng kuăn pơlê xiâm, Kăn cheăng tung Khu hnê mơhno pơkuâ xiâm pơkuâ djâ khu râ kăn hiăng ai roh pêi cheăng ƀă Khu pêi cheăng Đảng dêi Khu xiâm pơkuâ ‘na pêi chiâk deăng ƀă mơnhông mơdêk thôn pơlê tiô pơkâ kơxô̆ 18 dêi Khu hnê mơhno.

Khu hnê mơhno tơnêi têa ‘na hbrâ mơdât kâ kơhveăm liăn ngân séa ngăn a Khu xiâm pơkuâ ‘na chiâk deăng ƀă mơnhông thôn pơlê

Xông tơpui a roh pêi cheăng, pôa Nguyễn Hòa Bình pơkâ thế khu pêi cheăng Đảng Khu xiâm pơkuâ ‘na pêi chiâk deăng ƀă mơnhông mơdêk thôn pơlê hbrâ hlá mơ-éa, tơdroăng xiâm tơbleăng, tiâ tiô pơkâ dêi Khu râ kăn pêi cheăng. Klêi kơ’nâi roh séa ngăn kô ai mơnhên mâu tơdroăng ki châ tơƀrê, tơdroăng ki tá hâi châ tơƀrê vâ tơleăng tơdroăng tơbleăng, xăm tối mâu ngế xôi ối tung hnoăng dêi Khu xiâm pơkuâ ‘na pêi chiâk deăng ƀă mơnhông mơdêk thôn pơlê ing mê pơkâ thế Khu xiâm kal kí, Khu hnê mơhno mâu troăng hơlâ vâ tơleăng tơdjuôm tung lâp tơnêi têa tung la ngiâ.

A Sa Ly tơplôu ƀă tơbleăng