A rôh pêi cheăng, teăng mâ mâu khu râ, kơvâ cheăng kong pơlê Dak Lak hiăng tối hên tơdroăng ki pá puât ƀă pâ thế tơnêi têa séa ngăn, tŏng gum mâu tơdroăng ăm mơnhông cheăng kâ, rêh ối dêi kong pơlê tung la ngiâ.

Pâ thế ‘na mâu tơdroăng tơvâ tung mơjiâng pro ôm hyô a kong pơlê, pôa Lại Đức Đại, Kăn phŏ pơkuâ Khu ngăn Túa lĕm tro – Tơ’noăng ivá ƀă Ôm hyô kong pơlê Dak Lak tối tiah kố, mâu kong pơlê Tây Nguyên, tung mê ai Dak Lak ai hên tơdroăng ki ai hlâu vâ pro ôm hyô pơlê pơla, ôm hyô pêi chiâk deăng – thôn pơlê.

Laga nôkố tá hâi ai pơkâ nhên ‘na tơnêi tơníu ki vâ pơhlêh tơnêi pêi chiâk deăng chiâng tơnêi vâ pro ôm hyô mê mâu khu mơdró kâ ôh tá khên ‘no liăn hên a kơvâ cheăng kố. A rôh pêi cheăng, mâu kăn xuân pâ thế hên tơdroăng tơdjâk troh kơvâ pêi chiâk deăng, kế tơmeăm tung kơdâm tơnêi, ƀaoh hiêm, luât, on tơhrik ƀă hên ki ê.

Khu kăn Kuô̆k hô̆i kong pơlê Dak Lak tơmâng xo mâu rơkong tơpui tối, pâ thế dêi mâu kăn, chêh ‘măn tâi tâng, vâ pơtroh ăm Kuô̆k hô̆i ƀă mâu Khu xiâm kơvâ cheăng séa ngăn.