VOV4.Xơ Đăng - Hâi lơ 20/5, Khu kăn Kuô̆k hô̆i kong pơlê Dak Lak tơkŭm po Rôh hôp xo rơkong veăng tơpui tối ‘na kơxop hlá mơéa Luât kô châ Kuô̆k hô̆i mơ’no séa ngăn a hneăng hôp má 3, Kuô̆k hô̆i má 15 la ngiâ. Mâu kơxop hlá mơ-éa luât châ Khu kăn Kuô̆k hô̆i kong pơlê Dak Lak xo rơkong veăng tơpui tối mê cho: Luât séa ngăn ki ‘mâi hơ’lêh, Luât pêi pro tơniăn krê, Luât Têa châu têa kơxăng ki ‘mâi hơ’lêh, Luât hbrâ mơdât tơxiăn tơpâm tung rơpŏng hngêi, Luât khăm pơlât, ki ‘mâi hơ’lêh ƀă Luât pêi pro rak tơniăn krê a mâu tơring, cheăm.

Khu kăn Kuô̆k hô̆i kong pơlê Dak Lak xo rơkong tơpui tối tung kơxop hlá mơéa Luât 

Mâu kăn pơkâ thế kal mơjiâng tơdroăng pơkâ, hnê mơhno nhên ‘na tơdroăng ki pơkâ tơleăng chêh pro hlá mơ-éa ƀă mâu tơdroăng pơkâ dêi luât séa ngăn khu pơkuâ tơring cheăm râ cheăm ‘na pêi pro tơniăn krê a cheăm, bêng, pơlê kân. Malối, kal pơkâ nhên tâ ‘na hnoăng cheăng, pôu râng dêi Khu séa ngăn kuăn pơlê a khu mơdró kâ vâ rak tơniăn tơdroăng cheăng séa ngăn dêi mâu ngế pêi cheăng ƀă mâu ngế ki xúa mâu ngế pêi cheăng.

Katarina Nga tơplôu ƀă tơbleăng