Roh hôp mê hiăng châ tơkŭm tiô tơdroăng ki trâm mâ a Tíu pêi cheăng dêi Hô̆i đong hnê ngăn kong pơlê Dak Lak ƀă ai tá tơdroăng ki mơ’no tung um a 6 tíu, mê cho mâu tơring Čư̆ Mgar, Krông Ana, MDrak, Ea Kar, Krông Bông ƀă Lak. Ai lối 1 rơpâu 200 ngế kuăn pơlê hiăng veăng hôp ƀă mâu kăn roh kố. Xông tơpui a roh hôp mê, Khu kăn Kuô̆k hô̆i kong pơlê Dak Lak hiăng mơnê mâu rơkong tơpui tối, veăng hnê khĕn dêi kuăn pơlê ƀă vêh mơnhên mâu tơdroăng ki kuăn pơlê êng, tối mê kô châ khu kăn Kuô̆k hô̆i kong pơlê ƀă rêm râ, mâu kơvâ cheăng chêh tối, veăng tối ăm mâu kăn xiâm vâ rĕng châ mơnhên, pêi pro tơtro ƀă hiâm tuăn, hiâm mơno pói rơhêng vâ dêi tâi tâng kuăn pơlê.

*** Tung 2 hâi lơ 30/11 ƀă 1/12, Khu kăn Kuô̆k hô̆i kong pơlê Dak Nông hiăng lăm trâm mâ kuăn pơlê a cheăm Dak N’Drot (tơring Dak Mil), cheăm Tâm Thắng (tơring Cư Jut), cheăm Dak Hòa (tơring Dak Song ƀă bêng Quảng Thành (pơlê kong kơdrâm Gia Nghiã). A rôh trâm mâ, klêi tơmâng mâu kăn Kuô̆k hô̆i tơbleăng tơdroăng tơpui dêi rôh hôp má 6, Kuô̆k hô̆i hneăng 15, kuăn pơlê tối sôk ro hiăng ƀlêi chiâng dêi hneăng hôp, ƀă khĕn kơdeăn mâu tơdroăng ki mơ-eăm dêi mâu kăn kong pơlê Dak Nông hiăng teăm pâ thế hên tơdroăng ki kal tung pêi pro ăm tơtro ƀă tơdroăng púi vâ dêi kuăn pơlê.

Kuăn pơlê Dak Nông xuân pâ thế pêi tro tâ nếo tơdroăng rêh ối, kal kum ƀaoh hiêm khăm pơlât ăm kuăn pơlê ki xơpá; malối cho luât pơkâ ‘na liăn khế, pơkâ ăm kâ liăn chiá hôm iâ ƀă mâu kăn ƀô̆ ngăn pơkeăng, kăn ƀô̆ hnê hriâm; ƀă kum liăn rôe pơkeăng pơlât, ‘na ôh tá tŭm vaccine pâk mơdât pơreăng ăm vâi hdrêng.