Tiô tơdroăng tối tơbleăng, 9 khế hơnăm 2023 châ 6,8%, châ hên má môi tung kơpong Tây Nguyên. Maluâ ti mê, mâu kơlo cheăng ki kal bu châ a kơlo ki iâ, ki nhên: Tơdroăng pêi lo liăn ngân ăm tơnêi têa châ dâng 2.400 rơtal liăn (tơ’mô dâng 54,27% tiô tơdroăng pơkâ hdrối); ăm mung mơ’no vâ pêi pro tơdroăng cheăng tơdjuôm dêi tơnêi têa châ lối 1.300 rơtal liăn, châ dâng 35% tơdroăng pơkâ. Roh hôp hiăng tơkŭm tơpui tơno, vêh mơnhên ngăn tơdroăng ki hiăng châ chiâng pêi pro; mơhno tối tơdroăng ki u ối, vêh mơnhên hnoăng cheăng dêi tơrêm ngế đảng viên tung khu kăn pơkuâ hnê ngăn  Đảng, ngế pơkuâ xiâm kơ koan, đông lêng, tơring, cheăm ƀă mâu tơdroăng ki tá hâi teăm châ chiâng pêi pro.

Tiô pôa Dương Vân Trang - Kăn pơkuâ hnê ngăn Đảng kong pơlê Kon Tum tối: 3 khế mơ’nui hơnăm kố tơdroăng ki ăm mung liăn ngân pêi cheăng kâ cho tơdroăng ki kơdo mơ-eăm dêi khu kăn pơkuâ, hnê mơhno tối. Tâng ôh tá châ ăm mung liăn mê ki ahdrối tâ, Khu kăn pơkuâ hnê ngăn Đảng Vi ƀan kong pơlê athế pôu râng dêi xêh. Kăn pơkuâ pơkâ ƀă mơ’no liăn cheăng cho kơ koan ki veăng hnê tối, mơhnhôk ƀă troh mơ’nui cho ngế ki pơkuâ xiâm athế pôu râng dêi hnoăng cheăng ki kố.