Khu kố hiăng tối mơnhên pơkâ ƀă tối tơbleăng tơdroăng pơkâ cheăng tung hnoăng pơkuâ ngăn, hnê mơhno tối, pơkuâ djâ xiâm ƀă tơkŭm po tơdroăng rak vế, pêi pro tơdroăng mơgêi kơxô̆ 67 hơnăm 2019 dêi Khu xiâm ngăn cheăng kal kí ‘na mơjiâng ƀă mơnhông pơlê kong kơdrâm Ƀuôn Ma Thuột troh a hơnăm 2030, hnoăng cheăng pêi pro troh a hơnăm 2045 ah nếo.

Tiô tơdroăng pơkâ, Khu séa mơnhên ngăn dêi Khâu hnê mơhno pêi cheăng kâ xiâm Đảng kô séa mơnhên ngăn tung plâ 45 hâi, ƀă 6 khu pêi cheăng ki ai tơdjâk, vâ seá mơnhên ngăn tŭm têk tâi tâng mâu tơdroăng ki pêi pro, mơhno tối mâu tơdroăng ki pêi pro ki hiăng lĕm tro, tơ’ló, xuân mơhno tối, tơpro mơnhên mâu tơdroăng tá hâi teăm tro, ki xahpá, tơvâ tơvân, mơnhĕn klêi kơ’nâi rak vế - pêi pro tung plâ 4 hơnăm tiô tơdroăng pơkâ kơxô̆ 67 hơnăm 2019 KL/TW dêi Khu xiâm ngăn cheăng kal kí ‘na “Mơjiâng ƀă mơnhông Pơlê kong kơdrâm Ƀuôn Ma Thuột, kong pơlê Dak Lak troh a hơnăm 2030, hnoăng cheăng vâ pêi pro troh a hơnăm 2045”. Ing mê, pơkâ mơ’no mâu troăng hơlâ vâ tah lôi ki xahpá, tơvâ tơvân rak vế, pêi pro tiô hnoăng cheăng ki mơgêi 67 hiăng mơ’no.